Aviisi: Kalaallit Nunaat namminiilivinngisaannassaaq

Kalaallit Nunaata nunatut namminiilivikkumaarnera piviusuunngitsumik takorluuineruvoq.

Kristeligt Dagbladip ippassaq sapaammi saqqummersitami taama allaaserisaqarpoq.

Aviisip aaqqissuisuisa pisortaata, Karin Dahl Hansenip nunatta nunat allat kitaaniittut assigalugit namminersortuulernissaa akerlilerpaa.

Taassuma oqarnera naapertorlugu tamanna aningaasanik pissuteqarpoq.

Nunatta aningaasaqarnera Danmarkimit naalagaaffimmit tapiissutinut suli pituttorsimavoq.

Tassunga nunatta Namminersorlutik Oqartussat eqqunneqarneranit ukiuni 15-ini akisussaaffinnik marluinnarnik tigusisimanera takussutissaavoq. Tassanilu nunatta karsia isertitanik amigaateqarnera pissutaalluni.

Taarsiullugulu nunatta pissaanilissuit akornanni inissisimanini naleqaatiginerpaavaa. Tassanilu Danmark suleqatigisani pitsaanerpaasoq, aaqqissuisut pisortaat oqarpoq.

- Danmark pissaanilissuit pissaaneqarniunnerannut illersuisussatut pitsaanerpaavoq, taamaammallu naalagaaffeqatigiinni ataatsimoortariaqarpugut, tassani allassimavoq.

Karin Dahl Hansenilli "ataqqinnittumik suleqatigiittoqarnissaa nunasiaatilittullu pissusilersortoqannginnissaa" kaammattuutigaa.

- Naak Danmark aningaasaqarnikkut sillimaniarnikkullu politikkimi atassuteqarnermi annerusutut inissisimajuaannartussaagaluarluni kalaallinut tusarnaarluarnissaa ataqqinnittumillu iliuuseqarfiginissaat isumatusaarneruvoq, naligiimmik atassuteqarnissaq pisariaqarpoq, taanna allappoq.