Folketingimi ilaasortat: Kalaallit Nunaat Danmarkilu aatsaat taama akerleriissuteqartigipput

Spiralilersuisimaneq, kalaallit inatsisitigut ataataqanngitsut taarsiiffigeqqunerat, inatsisinik unioqqutitsilluni meeravissianngortitat danskimillu Issittoq pillugu aallartitanngortitsineq.

Taakku piffissami kingullermi oqallisaaqisut nunatta Danmarkillu akerleriissutaasa ilaminiinnaraat.

Folketingimilu ilaasortani nunatsinneersut Folketingimi inaarutaasumik pingasunngornermi maajip ulluisa 31-anni oqallinnermi taama erseqqissaapput.

Nunatta Danmarkillu oqaluttuarisaaneranni pisimasunut tunngasuni Folketingimi ilaasortani aatsaat taama akerleriittoqartigisoq, Inuit Ataqatigiinneersoq Aaja Chemnitz oqarpoq.

- Oqaluttuarisaanerput pillugu ilisimasaqarneruleriartortilluta oqaluttuarisaanerput aamma tujorminartortaqartoq paasivarput. Oqaluttuarisaanitta nuanniitsortai saqqummerapiloorput, taanna oqarpoq.

Ilaasortaqataa Siumumeersoq, Aki-Matilda Høegh-Dam, ajornartorsiutit tamakku pillugit aamma oqaaseqarpoq, politikereqatitillu danskit oqaaseqaraangamik nunatsinni susassaqarfinnik Danmarkip suli akisussaaffigisaanut tunngasunik oqaaseqartanngitsut taassuma maluginiarpaa. 

Aki-Matilda Høegh-Damilli kalaallisut Folketingimi sapaatit akunnialuit qaangiuttut oqalugiarnera uitsatigineqarpoq. Tamannalu quiassuaatissapajaaajusoq, taanna isumaqarpoq.

- Ilami tupinnaraluttuaq. Oqaatsimmi allat atorlugit oqalugiarnera mamiatsaataasimaqaaq, Aki-Matilda Høegh-Dam oqalugiarami oqarpoq.

Ajornartorsiutinik suli aaqqitassaqartoq

Ajornartorsiutilli oqallisaagaluartut suli aaqqitassarpassuaqarpoq.

Soorlu nunatsinni pineqaatissinneqarsimasunut inissiisarfinni nakkutilliisut politiillu akissarsiaat. Taakkorpiaat akissarsiaasa qaffannissaannut 2020-mi aningaasaliissutit pillugit isumaqatigiissut ukiortaami atuukkunnaassaaq.

Danmarkip aningaasaqarnermut ministeria Folketingip akissarsiat pillugit siunnersuisoqarfiata innersuussutaa malillugu tamannarpiaq aaqqereersimasussaagaluarpaa. Sulili taamaaliunngilaq.

Tamannalu isornaqisoq, Aaja Chemnitz oqarpoq. Aaqqiisoqanngippammi nakkutilliisut politiillu suliffimminniit qimarratissasut, taanna isumaqarpoq.

- Taakku akissarsiaasa qaffanneqavinnissaannik aaqqiilertortoqartariaqarpoq. Assigiimmik suliallit assigiimmik akissarsiaqarnissaat qulakkeertariaqarparput.

Aki-Matilda Høegh-Dam tamatumunnga tapersiivoq, eqqartuussivimmilu suliat sivitsoruttooqqanerat, Naalagaaffiit Peqatigiit Danmarkimi kalaallit inatsisitigut isumannaassusaannut tunngasuni isornartorsiutaat spiralilersuisimanerlu ajornartorsiutinut suli aaqqitassanut ilaasut taassuma oqaatigaa.

- Siumup tamakkorpiaat ukiorpassuanngortuni oqallisissiarisarpai. Tusaajumaneqarpasinngilagulli, Aki-Matilda Høegh-Dam oqarpoq.

Aki-Matilda: Neriuutissaqarpoq

Nunalli marluk taakku aamma ilorraap tungaanukarfeqartut, Aki-Matilda Høegh-Dam aamma isumaqarpoq.

Taassuma ministeriuneq Mette Frederiksen pisimasunik oqallisiginnissinnaaneranik, Danmarkimi tusagassiutit politikerertatsinnik tusagassiisarnerannik Danmarkimilu kalaallit assigiinngisitaasarnerminnik oqaluttuarlutik sassartarnerannik nersorpai.

Danmark nunatsinnik nunasiaqartuusimanerminik miserratiginnikkunnaartariaqarlunilu ilisimasaqarnerusariaqartoq, Radikale Venstrekkut Alternativekkullu aamma oqarput. Ministeriunerup Mette Frederiksenip (S) Folketingimi ilaasortani Atlantikup Avannaaneersut sisamat naalagaaffeqatigiinnermut tunngasuni oqallinnerulersitsinerannik aamma qutsavigai.

- Sisamaallusi tamassi naalagaaffeqatigiinnermi ajornartorsiutit ilaannik oqallinnermi pingaaruteqarpusi, allanut aqqutissiuilluartarpusi aamma Savalimmiuni Kalaallit Nunaannilu oqallisigineqartut pillugit Folketingimi ilaasortaqatissinnut saqqummiisarpusi.

Taamaakkaluartoq danskit politikerii arlaannaalluunniit politikerertatta ajornartorsiutinik suli aaqqitassaaneragaannik aaqqissutaasinnaasunik siunnersuuteqanngillat.

Naalagaaffeqatigiilli Nuummi juunip ulluisa arfernanni arfineq-aappaannilu ataatsimiissasut, ministeriunerup Mette Frederiksenip marlussoriarluni eqqaavaa. Damarkip naalakkersuisui, Naalakkersuisut Savalimmiullu naalakkersuisui naalagaaffeqatigiit ajornartorsiutaat tassani ataatsimiissutigissavaat.