Kalaallit arnat niviarsiaqqallu tuusintilikkuutaat akuersiteqqaarnagit 1960-ikkuni 1970-ikkunnilu spiralilersorneqarsimasut Danmarkimi naalakkersuisunit utoqqatserfigineqartariaqarput.

Tamannalu pillugu qulaajaasoqannginnerani tamanna pisariaqarpoq.

Inuit Ataqatigiit sinnerlugit folketingimut ilaasortaq Aaja Chemnitz, Folketingimi inaarutaasumik pingasunngornermi oqallittoqarnerani taama oqarpoq.

- Taarsiissuteqartoqarnissaa sioqqullugu utoqqatsertoqartariaqarpoq, taanna oqarpoq.

Spiralilersuisoqarsimanerata qulaajaaffigineqarnissaanut suliaq maanna aallartinneqalersoq, Danmarkip nunamut namminermut peqqissutsimullu ministereqarfiata marlunngornermi nalunaarutigaa.

Qulaajaasoqarnissaanut siorna neriorsuuteqartoqareerpoq, utoqqatsertoqarnissaali oqallisigineqarnani.

Spiralilersuisoqarnissaanut aalajangiinerup tungaanut qanoq pisoqarsimanersoq qulaajaaffigineqarniarpoq.

Aaja Chemnitzili taamaattoq isumaqarpoq Danmark qulaajaasoqannginnerani arnanut niviarsiaqqanullu utoqqatsertariaqartoq.

Danskit naalagaaffianit taarsiissuteqarnissaa arnat maannamut 140-t piumasaqarniarnerat pissutaavoq. Arnammi pineqartut utaqqinianngillat.

Aaja Chemnitz Folketingimi oqallittoqarnerani ima oqarpoq:

- Arnat pineqartut naalagaaffik eqqartuussivilersuunniarpaat. Eqqartuussivilersuussineq tapersersorpara, qulaajaanerullu naammasseqqaarnissaanut utaqqisariaqannginnerat aamma tapersersorpara, Aaja Chemnitz oqarpoq.

Ehmer Pramming Advokaterip arnanut 140-nut eqqartuussissuserisuusup taarsiissuteqartoqarnissaanut piumasaqaat qanoq nipeqarniarnersoq suli paasissutissiissutigisinnaanngilaa.

Eqqartuussissuserisulli taarsiissuteqarnissamut piumasaqaat qaammatialuit qaangiuppata nassiunnissaa naatsorsuutigigaa, Mads Pramming paasissutissiivoq.