VM-ernissamut makitsineq: Kalaallit kikkut unammissaneraat ullumi paasissavarput
Nunatsinni arnat assammik arsarlutik nunanut allanut unammisartuisa novembarimi VM-eqataagunik assammik arsallammassuit unammissassavaat.
Danmark, Norge Sverigelu tassaassapput novembarip 29-niit decembarip 17-iata tungaanut unammisaqattaarfiusussat. Nunarput kikkunnut unammissanersoq ullumi nalunaaqutaq 11.25 makitsisoqarpat paasineqassaaq.
Makitsinissarlu Andrea Heilmannip Najaaja Lyberthillu pissanngatigaat. Taakku assammik arsallammaat nunatsinneersut nunani allani unammisartunut pikkorissorsuarnut qaammatit tallimaanngitsulluunniit qaangiuppata unamminissartik qilanaareqaat.
- Taannaqa sungiusariarnissaq, haha, taakku marluullutik oqarput.
- Suli periarfissaqalaarpugut. Piareersimavugut, kisianni suli sungiusarnissamut piffissaqarnerput atorluassavarput, Najaaja Lyberth KNR-imut oqarpoq.
Norgemut unammerusuttut
Nunat VM-imut peqataasussat tamarmik ukiuni kingullerni angusaat aallaavigalugit sisamanut immikkoortiterneqarsimapput, taakkulu aallaavigalugit makitsisoqassaaq.
Nunat angusarissaarnerpaat pot 1-imik taaneqartumiittut ilaatigut tassaapput Danmark, Norge, Sverige aamma Frankrig.
Nunallu angusarlunnerpaat pot 4-miipput. Nunarput pot 3-miippoq.
Kikkut naapikkusuppisigit?
- Pot 1-minngaanniit norskit naapikkusunnerpaavakka, taava pot 2-miit Spania. Pot 4-miittut nalulaarakkit nalunalaarpoq, Najaaja Lyberth oqarpoq.
- Uanga pot 1-imiit norskit aamma naapikkusuppakka, taava pot 2-miit Romania, pot 4-miit Paraguayikkut imaluunniit Islandikkut, Andrea Heilmann oqarpoq.
VM-imut Nuummi juunimi anngunniuttoqarmat innuttaasut nuannattunnguupput. Nunarput ajorsatinneqanngiivilluni ajugaaniutivinnermi Canadamut unamminermini 17-raarluni ajugaavoq, Canada 15-eraartoq.
Nunarput anngunniunnermi unamminerni imatut angusaqarpoq:
Mexico – Kalaallit Nunaat 22-24
Kalaallit Nunaat – USA 27-12
Cuba – Kalaallit Nunaat 19-25
Kalaallit Nunaat – Canada 30-19
Makitsineq ullumi nalunaaqutaq 11.25 maana knr.gl-ikkut malinnaavigisinnaavat.