Kalaallit Islandimi unnerluutigineqartut: Ukiuni arfinilinni paarnaarussassanngortinneqarsinnaasut
- Qanoq pineqaatissinneqassanersut oqaatigiuminaappoq.
Islandimi eqqartuussissuserisoq, Arnþrúður Þórarinsdóttir, angutit kalaallit marluk 54-inik 34-nillu ukiullit kiisalu angut danskeq 21-nik ukiulik pillugit eqqartuussinermi suliaqartuusoq oqarpoq.
Unnerluussissut naapertorlugu umiarsuarmi ”Cocotte”-mi hashi 157 kiiluuteqarnerminni ikiaroornartunik peqqarniitsumik pinerluuteqarput.
Angutit ikiaroornartoq taama annertussuseqartoq nunatsinni tuniniarniarlugu tikiunniarlugu pilersaarutigisimavaat. Islandimiulli politiivi pasitsaassaqartut tamatumanik juunip 23-anni tallimanngornermi unitsitsillutik angutit Islandip kujasissortaani sissami tigusaraat.
Arnþrúður Þórarinsdóttir taamanili suliamik suliaqalerpoq.
Eqqartuussivik aalajangiissasoq
Taassuma unnerluussisussaatitaasullu angutit pingasut pineqaatissinneqarnissaannut sulissutigisartik pineqaatissiissutigineqartoq tallimanngornermi saqqummiuttussaagaluarpaa. Taamali pisoqanngilaq, suliammi assingusut nassaassaasut amerlanngillat. Tamatuma saniatigut ikiaroornartut soorlu kokainit amfetaminillu sakkortunerullutillu ulorianarnerupput, Arnþrúður Þórarinsdóttir nassuiaavoq.
- Ikiaroornartulli annertuut pineqartut oqaatiginiaannarpara. Kisianni piffissami kingullermi sulianik taama ittunik amerlanngitsuinnarnik suliaqarpugut, taamaallaat qanoq pineqaatissinneqarnissaat eqqartuussivimmut aalajangerneqartussanngortippara, taanna oqarpoq.
Unnerluussisulli ikiaroornartunut annertuunut tunngatillugu suliani annerpaamik, naak ilimanarpallaanngikkaluartoq ukiunik aqqaneq-marlunnik pineqaatissiisoqarsinnaasoq ilanngullugu oqaatigaa.
- Qulakkeerlugu ilisimanngilara. Kisianni naamik annertunerpaamik pineqaatissinneqarnavianngillat. Affaanik pineqaatissinneqarnissaat ilimagisinnaavara, Arnþrúður Þórarinsdóttir oqarpoq.
Sapaatit akunneri sisamat qaangiutsinnagit eqqartuussut suaarutigineqassasoq
Angutit kalaallit umiatsiamik ikiaroornartunik annertuumik useqartumik ingerlatsisut angullu danskeq 21-nik ukiulik unnerluussissut naapertorlugu Danmarkimit Islandimut timmisartorluni atortorissaarutini, pilersuutissanik kiisalu siunertamut aningaasanik tunniussiartortoq pinngitsuunerarput.
Eqqartuussisup eqqartuussivimmi suliami qaqugu aalajangiisoqarnissaa suli aalajanginngikkaa unnerluussisup oqaatigaa. Suliamili sapaatit akunneri sisamanngortinnagit eqqartuussuteqartoqassaaq.
Taakku pineqaatissinneqassagunik Islandimi parnaarussaassanersut suli ilisimaneqanngilaq.
- Eqqartuunneqassagunik qanoq pisoqarnissaa suli ilisimanngilara. Kisianni nunat ataasiakkaat akornanni pineqaatissinneqartut nunagisaminni pillaatissamik atuissanersut isumaqatigiissuteqartoqanngippat Islandimiillutik pillaatissamik atuinissaat soorunami malittarisassaavoq.
