Kalaallit Islandimi eqqartuussivimmi suliami pingaarnertut inissisimasut
Islandimi eqqartuussivimmi piffissami nutaanerusumi suliani uissuumminarnerpaat ilaat aallartinneqarpoq.
Eqqartuussinermi suliaq nunatsinnut atassuteqarpoq.
Kalaallit marluk 54-inik ukiulik aamma 34-nik ukiulik angullu danskiusoq 21-nik ukiulik umiarsuarmik tingerlaataannalimmik Islandimut hashimik 160 kiilumik anngiortumik ukioq manna juunimi eqqusseriarput.
Unnerluussisussaatitaasut umiarsuaq Danmarkimit Kalaallit Nunaannut ingerlaartuusoraat.
Politiit umiatsiarlu pullattagaq
Unnerluussissut naapertorlugu angut danskeq 21-nik ukiulik atortussanik pilersuutissanillu tunniussiartorluni timmisartumik Islandiliarnissaminut ilitsersuunneqarsimavoq. Tunniussineralu Islandip kujasissortaani Garðskagavitami sissami pisussaalluni.
Pilersaarutilli malillugit ingerlasoqanngilaq. Kalaallinimmi angutinik marlunnit ataaseq umiatsiaq pullattagaq atorlugu nunamukarnera iluatsikkaluartoq taanna islandimiut politiivinit eqeersimaartunit unguneqarpoq tigusarineqarluni.
Islandimiut nittartakkatigut tusagassiisarfiat, Visir taama allaaserisaqarpoq.
Kalaallit angutit ikiaroornartunik annertuumik pinerluuteqartutut pasineqarput, angullu danskiusoq pinerluuteqarnermut suleqataasutut pasineqarluni.
Angutit juunip ulluisa 23-anni tigusarineqaramilli islandimiut politiivinit tigummigallarneqalerput.
KNR-p paasissutissarsiarisai naapertorlugit unnerluussisussaatigaasup, Arnþrúður Þórarinsdóttirip pineqaatissiissut unnerluussisussaatitaasut angutinik pingasunik eqqartuussiniarnerannik ilaqartoq tallimanngormat saqqummiunniarpaa. Kalaallit angutit angulluunniit dankiusoq ilisimannittutut nassuiaateqarnerminni nassueruteqanngillat.
KNR-ip unnerluusissussaatitaasoq oqaaseqartinniarsaraa.
Kalaallit Nunaanni Politiit suliamut atatillugu oqaaseqarumanngillat.