Eqqartuussiviit qullersaat: Kalaallit innuttaasut Danmarkimi kommuninit akiliunneqartassapput

Randersimut aamma Lollandip Kommuneanut Danmarkimiittunut akiligassat millionilikkaanik nalillit nassiunneqassapput.

Danmarkimi Kommunet tassaapput najugaqarfinnut isumannaallisakkanut kalaallit innuttaasut inissinneqarfigisimasaannut nunaminertaqartitsisut. Aamma tassaapput kalaallit inissinneqartarfimmiitillutik pinerloqqippata akiligassamik isumaginnittussat.

Tunngaviusumik eqqartuussivimi suliaq Eqqartuussiviit Qullersaanni Danmarkimiittumi marlunngornermi aalajangiiffigineqarpoq.

- Inatsisitigut innarlitsaalisaanermut inatsit Kalallit Nunaanni atuutinngilaq, taamaammat Kommuneqarfik Sermersooq inissinneqarsimasumut atatillugu aningaasaasartuutinik akiliisussatut piumaffigineqarsinnaanngilaq, eqqartuussivimmi aalajangiinermi allaqqavoq dommen fra Højesteret.

Sermersooq Eqqartuussiviit Qullersaata ajugaatippaa

Akiligassamik kikkut akiliissanersut pillugu suliaq ukiuni arlalinni saqitsaassutaavoq, uani kunngeqarfiup innuttaasa pinerluuteqarsimasut parnaarusimaneqarneranni akiligassat kiap isumagissaneraat tunngaviusumik pineqarpoq.

Suliami uani pineqartut tassaapput angutit marlulissat ineriartornermikkut akorngutillit Kommuneqarfik Sermersuumeersut. Taakku Nuup Eqqartuussiviani 2010-mi ilaatigut inummik toqutseriarsimanertik pillugu eqqartuussaapput.

Pineqaatissinneqartut immikoortillugit ineqarfimmi isumannaallisagaasuni Randersimiittumi aamma Lolland Kommunemiittumi Danmarkimi ineqartinneqartinneqarput.

Ineqarfinniitillutik qatanngutigiit pinerluuteqaqqipput, pillakkallu isumannaallisakkamut inissineqarnissaannut kommunit marluk akiligassinneqarput.

Kisianni Danmarkimi kommunit isumaqarput qatanngutigiit Kalaallit Nunaanni kommuni aggerfiat, pineqaatissiinerit sivitsornerat pillugu akiligassaalersussanik isumaginnittussaasut. Danmarkimimi innuttaasup kommuni allami matoqqasumut inissinneqarneranut atatillugu aningaasartuutit kommunip aggerfiata akilissagai ileqquuvoq.

Danmarkimi inissinneqartarfiit nunap immikkoortuisa pigaat ingerlataralugillu, kommunilu tassaavoq nunaminertaatilik.

Eqqartuussiviit Qullersaat: Pineqaatissiinerit nutaat Danmarkip akilertassavai

Qatanngutigiit pinerloqqinneranni pineqaatissiinernut atatillugu akiligassat Kommuneqarfik Sermersuup akilereerpai, kisianni Randersimut aamma Lolland Kommunemut akiligassatut nassiullugit. Taama iliornnerannut tunngaviuvoq pineqaatissiinermik sivitsuinermi kommunip aggerfiup akiliinissaa Danmarkimut atuuttuummat, Kalaallit Nunaannut atuunnani.

Sermersooq isumaqarpoq, kalaallit innuttat Danmarkimi kommunimi pinerlunnerup nalaani adresseqarfigisaat akiligassamik isumaginnittuussasut.

Danmarkimi naammagittaalliuuteqartarfik siusinnerusukkut aalajangiinermini naqissusiivoq, Kommuneqarfik Sermersooq eqqortumik iliorsimasoq nalilerneqarmat siullermik Nykøbing Falsterip Eqqartuussiviani aamma Randersip Eqqartuussiviani kingullermillu Vestre landsretimi Danmarkimi.

Eqqartuussiviit Qullersaat maanna assinganik naliliivoq. 

-Danmarkimi pinerluuteqarsimasunik pineqaatissiinermut inatsit malillugu A aamma B (qatanngutigiit, aaqq.) Nuup Eqqartuussiviata aalajangiineranut attuumassuteqarunnaareerput, taamaammat pinerloqqinnerat Danmarkimi inatsisit malillugit pineqaatissiineruvoq. Taamaammat aamma isumannaallisagaasumut inissiinermut atatillugu akiligassat Kommuneqarfik Sermersuup isumagissanngilai, Eqqartuussiviit Qullersaat aalajangiivoq.

Kommuneqarfik Sermersuullu borgmesteriata, Avaaraq Olsenip nuannaarutigalugu tusagassiuutinut nalunaarummi oqaatigaa:

- Aalajangiineq ilorrisimaarutigaarput, pissutigalugu inatsimmik paasinninnerput eqqortuummat. Kommunitut inatsisitigut tunngavissaqarluta ingerlassinnaasagut kisimik aningaasartuutigisinnaavagut. Taamaammat suliami matumani taama qisuariarpugut.

Borgmester: Inatsit allanngortinneqassaaq

Lollandimi borgmesterip, Holger Schou Rasmussenip (S) eqqartuussut tupaallaatiginngilaa. Taamaakkaluartorli eqqartuussut naaperuilluannginnerusoraa.

- Maanna erseqqissisinneqarpoq, inatsit soorunami inatsisaavoq. Kisianni inatsit taanna kukkunerusoq isumaqarpunga. Naalakkersuisugut inatsimmut allanngueqquniarpakka, taanna KNR-imut oqarpoq.

Borgmesterip kommunit najugaqarfinnik isumannaallisakkanik Kalaallit Nunaanneersut, Savalimmiuneersut nunanillu allaneersut aamma inissinneqarfigisartagaannik peqarnissamut naaggaartalernissaat ernumassutigaa.

Inissinneqarsimasormi nutaamik pinerluuteqaqqikkuni eqqartuussiviit qullersaannit eqqartuussuteqarnerup kinguneranik kommuni akiligassarujussuaqalersinnaavoq. Akiligassarlu taanna danskit akileraartartut akiligassarilissavaat.

- Innuttaasoq ataaseq maanna pineqarpoq. Kisianni taavami ullut ilaanni innuttaasut qulit pineqarunik? Innuttaasoq ataaseq millioninik arlalinnik ukiumut akeqarpoq, taamaammat ukiumut 20 millionit koruuninik missingersuutini ujartuisariaqassaagut. Tamanna naleqqutinngilaq, Holger Schou Rasmussen KNR-imut oqarpoq.

Danskit politikerii malittarisassanik allanngortitsinianngikkunik naalagaaffik Lollandimut akiligassanik minnerpaamik akiliisariaqartoq, taanna isumaqarpoq.

Kommunit naalagaaffiup parnaarussiviinit – assersuutigalugu Herstedvester Fængsel kalaallinik innuttaasunik ataasiakkaanik suli parnaarussaaqqasoqartunit inissiiffiuteqartut – pineqaatissinneqarsimasup nutaamik pinerluuteqaqqinnerani akiliisussaasut borgmesterip erseqqissaatigaa.

- Taamaattoqarneratigullu kommuninik inissiiffinnik taamaattunik peqartoqarumajunnaassaaq, Holger Schou Rasmussen oqarpoq.