Tupilaat, tuukkat avittallu: Kalaallit nunanut allanut unammisartut atisanik unammissutinik nutaanik pisaarput

Kalaallit isikkamik arsarnermi nunanut allanut unammisartut nunatta kulturianik, kinaassutitsinnik anersaatsinnillu ersertitsisunik nutaanik atisaqassapput.
Kalaallit isikkamik arsarnermi nunanut allanut unammisartut nunatta kulturianik ersersitsisunik atisaqarlutik unammisalissapput. Assi © : hummel
decembarip 13-at 2024 15:40

Nunatsinnit isikkamik arsartartut pikkorinnerpaat unammigaangamik nunatta tulluusimaarnera nassatarisarpaat. Nunanut allanut unammisartut nunatta kulturia, ileqqui anersaavalu atisaminni ukiumi nutaamit aamma nassatarisalissavaat.

Tamanna Kalaallit Arsartartut Kattuffiata Hummelimik suleqateqarluni kalaallit nunanut allanut unammisartut atisassaannik nutaanik suleqatigiinneraat.

Hummel tusagassiuutinut nalunaarummi allappoq.

Atisat nutaat inuittut arsarnermi ataatsimoorneq pilersinneqartartoq takutissavaat. Isikkamik arsarneq qanoq ililluni illoqarfinnit nunaqarfinnut inuit akornanni qanoq atassuteqalersitsisartoq takutinneqassaaq.

Kalaallit inuit tulluusimaarnermut, nukissamut ataatsimoornermullu anersaavanut takussutissaavoq.

Tamatuma saniatigut atisap allalersornerani ileqqut kiisalu kinaassuseq anersaarlu kinguaariit ingerlaneranni oqaluttuarisaanermi ilaasut ersersinneqarput.

- Arsaannermi nunanut allanut unammisartunut atisat nutaat nunanut allanut unammisartunut atisanngortinneqarnerinnaanngilaq. Inuiattut kinaassutsitsinnik sunillu pingaartitaqarnitsinnik oqaluttuarput, Kalaallit Arsaattartut Kattuffianni siulittaasoq, Kenneth Kleist oqarpoq, nangillunilu:

- Unammisartut atisaat kulturitsinnut, oqaluttuarisaanitsinnut arsaannerullu ataatsimoortitsineranut assersuutaapput, siulittaasoq tusagassiuutinut nalunaarummi oqarpoq.

Ataatsimoornermik nersorinninneq

Nunatta kulturia ileqquilu unammisartut atisaannut allalersuutaapput.

Nunatsinni oqaluttuatoqqat anersaallu atisassaanni nutaami tupilaat, tuukkat avittallu kalaallit eqqumiitsuliornerisaat ersersinneqarput.

Den nye trøje kan bestilles online og købes i butikker fra 13. december.
Assi © : hummel

KAK-p Hummel nunatsinni arsarnerup ineriartorneranut pitsanngorsaanissamut siunertaqartumik juulimili suleqatigilerpaa.

Hummelip niuernermut pisortaata, Morten Lundip oqarnera naapertorlugu kalaallit kulturiannik, kinaassusaannik anersaavannillu KAK suleqatigalugu pilersitsiniarneq timersornermut atisanik tuniniaasumut pigaaruteqarluinnarpoq.

- Nunanut allanut unammisartut atisartaavat kalaallit inuit tulluusimaarnerannut, nukiinut ataatsimoornerannullu takussutissaavoq. Allatut oqaatigalugu Kalaallit Nunaata arsaannermi immikkuullarissumik ataatsimoorfeqarneranut aamma neriuutip ataatsimoornerullu ajugaaffiujuaannarfianut nersorinninneruvoq.

Nunanut allanut unammisartut atisartaavat nittartakkatigut pisiniarfinnilu aalajangersimasuni decembarip 13-ianit pisiarineqarsinnaalissaaq.