Kalaallit inatsisilerinermik ilinniartut naalagaaffeqatigiinni tamarmi sulinissamik takorloorsinnaalerput
Danmarkimi inatsisinik atuutsitsinermut ministereqarfiup aalajangeqqammerpaa inatsisilerituut nunatsinni ilinniarnikut, Danmarkimi Savalimmiunilu inatsisilerituunut nallersuunneqarsinnaanngortut.
Tamatuma kalaallinut inatsisilerinermik ilinniagaqartunut eqqartuussisutut, eqqartuussissuserisutut unnerluussisutullu naalagaaffeqatigiinni tamarmi atorfimmik qinnuteqarfiusinnaalersippaa, taamak Ilisimatusarfik tusagassiutinut nalunaarummini allappoq.
Eqqartuussiveqarnerup iluani assigiinngisitsineq aaqqiivigineqartoq
Maannamut kalaallit inatsisilerinermi kandidatitut ilinniarsimasut, Danmarkimi ilinniarsimanngikkunik, inatsisilerinermi qaffasissumik atorfeqarsinnaanikuunngillat.
– Ilisimatusarfimmi inatsisilerinermik ilinniakkamut pisoq tamanna pingaarnersat ilagaat - Naalagaaffeqatigiinnitsinnilu assigiinnik periarfissaqartoqarnissaanut alloriarneruvoq pingaarutilik, Ilisimatusarfimmi inatsisilerinermik ilinniarfiup immikkoortortaqarfiani pisortaq Anette Storgaard oqarpoq.
Ilisimatusarfimmik ukiorpassuarni suleqatigiinnerit oqaloqatigiittarnerillu kingorna Nuummi ilinniakkap Danmarkimi Savalimmiunilu inatsisilerinermik ilinniarfiit assinginik qaffasissuseqartoq, qallunaat inatsisinik atuutsitsinermut ministereqarfiat aalajangiivoq.
