Kalaallit erinarsuutaata nutaap oqaatsivut nersorai
"Paasitillara Oqaatsigut erinniaammata."
Erinarsuummi ’Oqaatsigut’-mi taallap ilaa taama ilaqarpoq, taanna tusarnaarfiusinnaasuni tamani aqagu saqqummissaaq. Erinarsuullu oqaaseqqaajusut ukkataqarineqarnissaanik siunertaqarpoq.
Clante PR & Kommunikation tusagasiuutinut nalunaarummi taama allappoq.
Erinarsuut kalaallit tuluttullu saqqummissaaq, taannalu oqaaseqqaajusunik oqaatsinillu minnerussuteqartunik nersorinninniarneruvoq.
- Kalaallit oqaasiisa innarlerneqalernerat 1950-ikkunni aallartippoq. Kalaallit atuarfiini danskisut oqaatsit siammasinnerulerput, ilaqutariillu ilaat kalaallisut oqalunnatik danskisut angerlarsimaffimminni oqalunnissartik toqqarpaat, danskillu aqqi siammasinnerulerlutik.
- Oqaaseqqaat kulturip, nalinginnaasumillu oqaatsit attanneqarnissaasa qanoq pingaartiginera erinarsuut una aqqutigalugu ukkatarineqalernissaat kissaatigaarput. Tamatuma saniatigut nipilersuut kikkunnut tamanut nuannaartitsisinnaavoq, taalliortoq aamma nunanit avannarlerni oqaatsinik ilisimatusarnermi Ph.d-qartoq, Yair Sapir tusagassiuutinut nalunaarummi oqarpoq.
Taassuma allat marluk peqatigalugit taallaq allappaat.
Yair Sapirip oqarnera naapertorlugu nunarsuarmi oqaatsit affaasa missaat arlerinartorsiorput – kalaallilli oqaasii taakkununnga ilaanngillat.
Kalaallisut oqaatsinik nersualaarineq
’Oqaatsigut’ aningaasanik iluanaarniutaanngitsumik suliniummit ’Small Languages Rock’-imik suliarineqarlunilu saqqummersinneqarpoq.
Erinartuut Sikki & TNA-mit atorneqarpoq, tassanilu Sikkerninnguaq Møller Sørensen erinarsortuulluni.
- Oqaatsit ilisimaneqarpallaanngitsut uanga oqaatsittut ittut ersersinneqarlutillu tusaaneqarnerat soqutiginarpoq. Erinarsuummik suliniut aqqutigalugu oqaatsitigut nipilersornikkullu ineriartorpunga. Misigisaq nuannerpoq, taanna oqarpoq.
Erinarsuut Københavnimi Nordatlantens Bryggemi aqagu saqqummersinneqarpat tusarnaarsinnaavat.
Suliniut nunatsinni Nunani Avannarlerni Piorsarsimassutsikkut Attaveqaammit NAPA-mit aningaasaliiffigineqarpoq.
