Angutip 25-nik ukiullip ujaarineqarnera unitsinneqartoq
![](/sites/default/files/styles/image_934x467/public/2024-03/H225_1.jpg?itok=xrWbO7py)
Oqartussat namminerlu kajumissutsiminnik suleqataasut angut 25-nik ukiulik Upernavimmi arfininngornermi aggustip 31-annili ujaarilerpaat.
Angut tallimanngornermi unnukkut festivalertoqarnerani najuuppoq, tassanngalu ingerlasoq takuneqarpoq, kingornali tusarfigineqaqqigani.
Kalaallit Nunaanni Politiit ujaasineq maanna unitsinniarlugu aalajangerpaat. Taakku tusagassiuutinut nalunaarummi allapput.
Upernaviup qeqertaa, sinerissap immamut killinga imartallu qanittumiittut ujaasiffigineqarput, ilisimannissinnaasorpassuit apersorneqarput, digitalikkullu takussutissaasinnaasut tamarmik misissorneqarlutik.
- Naak oqartussat inuinnaallu Upernaviup Qeqertaani eqqaanilu ujaasingaatsiaraluartut angut 25-nik ukiulik nassaarineqanngilaq. Piffissami matumani takussutissanik allanik malittareqqitassanngimmat ujaasineq ippassaq unitsinneqarpoq, tusagassiuutinut nalunaarummi allassimavoq.
Ilaqutaasut kalerrinneqareerput.