Angut ujaarineqarpoq: Upernavimmi festivaleqarnerani peqataavoq
![](/sites/default/files/styles/image_934x467/public/2023-11/7V9A0242.jpg?itok=AgQuxkKs)
Upernavimmi festivaleqarnerani angut 25-inik ukiulik peqataavoq. Festivaleqarfimmiit qimaguttoq takuneqarpoq, tamassumali kingorna sumiinnera nalornissutigineqalerpoq.
Angummik ujaarineqartumik nassarinninnissamut paasissutissanik tunniussisinnaasunik politiit qinnuteqarput.
Aggustip 31-iani unnuap qeqqata missaani kingullermik takuneqartoq politiit ilimasuutigaat. Aamma arfininngornikkut ullaassakkut 04.21 mobilia atorneqarsimasoq politiit ilisimavaat. Ujaasineq annertooq ingerlanneqaraluartoq suli nassaarineqanngilaq.
Upernaviup qeqertaa tamaat ujaasiffigigaluarparput pisunillu misissuilluarsimalluta, kinguneqanngitsumilli Politiit pigaartuisa pisortaat Jeppe Andsager oqarpoq.
Suliamut tunngasumut paasissutissaateqaraanni politiit sianerfigineqarsinnaapput 70 14 48-mut sianernikkut.
Quassussuarmi arnaq ujaarineqarpoq
Sapaartiummat ualikkut politiit qatserisartullu Quassussualiartariaqalersimapput, tamannalu pivoq ilaqutariinnit ernumasunit sianerfigitikkamik.
Ajunngitsoq nassaarineqarpoq.
Tamassumunnga atatillugu innuttaasunut nammineq piumassutsiminnik ujarleqataasunut politiit qujaniarput.
-Quassussuarmi inuppaalussuarnik silagissiortunut ujaarisamik ujaaseqataanerannut qujaniarpugut. Taakku paasitikkusuppagut ujaarineqartoq ajunngitsoq nassaarineqareermat Jeppe Andsager oqarpoq.
Nunatta Isiginnaartitsisarfianut biilit ikuallannerat siaruaappoq
Nuummi industrivejemi ikuallanneq akunnerup naaneranut ulapaarfiusumut naggasiivoq.
Biilit pingasut ikuallalersimapput. Ikulallanneq illumut siusinnerusukkut Nunatta Isiginnaartitsisarfiup inigisimasaanut siaruarpoq.
Ikuallannermi inunnik ajoqusertoqanngilaq, taamaakkaluartorli arlallit putsup sunniutigisinnaasai pillugit misissorneqarput.
Qanoq ikuallanneq pilersimanersoq politiinit suli oqaatigineqarsinnaanngilaq.
-Ikuallatsitsissoqarsimanersoq itigartissinnaanngilarput. Tamanna suli misissorparput, pigaartut pisortaat oqarpoq.
Taamaattumik Kalaallit Nunaanni politiit suliaq pillugu paasissutissanik ujartuipput tassa nal. 18.00 missaani Industrivejemiittoqarsimappat.