Nipilersortartatut amerlanersaasa tusarnaarneqarnerpaatut inissinnissartik takorloortarpaat.
Tamannalu takorluugaq nipilersoqatigiinnut Sauwesterikkunnut, Reggaerpalaartunik kalaallisut taallianik nipilersortartunut, takorluukkap piviusunngornissaa qanillgaluarpoq.
Nipilersoqatigiit nittartakkatigut nipilersuutaarniarfimmi iTunesimi, assigisaanillu nunarsuarmi nittartakkatigut nipilersuutaarniarfiit annerpaanni, nipilersortartut reggaerpalaartut allattorsimaffianni aggustip naalernerani tusarnaanneqarnerpaatut siuttuullutik inissisimasimapput.
Nipilersoqatigiilli nipilersugaat tamarmik septemberip aallaqqaataani Itunesimit, Spotifyimit, nittartakkatigullu videolianik siammarterivinniit, tassa Tidalimiit Youtubemiillu tamarmik peerneqarsimapput.
Tunngavigineqartoq: Amerlasuunit pasinartumik amerlavallaarsorinartunit tusarnaarneqarsimapput.
-Nuannarinnittut nuannaartorinnittullu nipilersukkatsinnik tusarnaarsinnaajunnaarsimapput. Nipagersagaanertut oqarsinnaajunnaasitaanertullu ippoq. Taama pisoqarnera paasisinnaanngilluinnarpoq, taama oqarpoq nipersoqatigiit ingerlatsisuat, Fabrizio Barzanti.
Kalaallit Nunaat Spotifyimi ilaanngilaq
Kalaallit Nunaata Spotifyimi Danmarkip ataani allassimanera taama pisoqarneranut nipilersoqatigiinnit peqqutaasorineqarpoq.
- Nittartakkatigut nittarsaassivinni digitaliusuni Kalaallit Nunaat, Danmarkitut, Italiatut imaluunnit USA-tut allaqqanngilaq. Assersuutigalugu arnap uummannameersup Sauwestarikkut toorunigit, nunatsinneersutut allaqqanavianngilaq, kisiannili københavnimeersutut allaqqalissaaq, taama oqarpoq Fabrizio Barzanti.
Nunarsuarmi sumiiffimmi ataatsimiit arlaleriarluni nipilersukkanik toorsisoqarsimanera, Spotifyimiit sakkortuumik pasinartutut isigineqarpoq. Killeqanngitsumik tusarnaartoqarsinnaanngortitsinissaq aallersinnaanissarlu aaqqiissuteqarfiginiarlugu nipilersukkanik siammarterivik qarasaasiatigut aaqqiissuteqarniarsarivoq.
Nipilersortartut immaqaluunnit nipilersortartoq, taamaaliornikkut tusarnaarneqarnermikkut, qaffasinnerusumut inississinnaapput, taamaalillutillu aningaasarsiornerusinnaallutik massa tusarnaartoqanngikkaluarlutik.
Nipilersoqatigiillu taamaaliorsimasutut pasineqarput. Amerikamiullu Sauwestarikkut nipilersugaannik saqqummersitsisut Tunecore, saqqummersitanik piiaaqqusivoq, tamanna Sauwestarikkut nipilersugaannik nalunaaqqaarani piiaanermik kinguneqarpoq.
-Tamanna assut erloqinarpoq, tusarniaaffigineqaqqaaratami taama pisoqarmat. Ima allakkaluarpugut: Kalaallit nunaat qivialaarsiuk. Iluarsiissutissamik anguniagaqarluta saaffiginnikkaluarpugut, kisiannili tamanna tusaajumaneqanngilaq, Fabrizio Barzanti oqarpoq.
Pisoq pereersoq nipilersortartut nammineerlutik, nittartakkatigut nipilersugaarniarfinni nipilersukkaminnik ikkussiniaraluarsimapput. Tamanna nipilersukkanik saqqummersitsisut, Tunecore, nipilersortartut kontoannik matusiniarlutik siorasaarinerannik kinguneqarpoq.
KNR-miit Spotify oqaaseqartinniaraluarparput sulili akissuteqartoqarsimanngilaq.
Ikkuteqqinneqarput aallaqqaataaneertariaqarlutilli
Pisoq Sauwestarikkut tusarnaarneqarnerpaat allattorsimaffianni aallaqqaataaniit ikkunneqartariaqarneranik kinguneqarpoq.
-Suna tamaa annaavarput. Tusarnaarneqarnerpaat akornanniikkaluarpugut. Nipilersukkavut inuit nuannaraat, tamanna nipilersortartunut pingaaruteqarpoq. Septemberimi nipilersukkatta peerneqarnerisa nalaani, screen-shotserivunga. 5.500-t qaammatikkaallugit tusarnaartorisarsimavagut. Kisitsisilli taakku tamaasa annaavagut.
Sauwestarikkut allamik nipilersukkaminnik saqqummersitsisartoqarput, saqqummersitsisarfik københavnimiippoq, nunatta Danmarkillu naalagaaffeqatigiinnerannik ilisimasaqarluarlutumik.
Nipilersortartut reggaerpalaartumik nipilersugaat, maannakkut Spotifymi, iTunesimi nittartakkatigullu nipilersugaarniarfinni allani tusarnaarneqaqqissinnaalereerput.
Aningaasat pineqanngitsup Fabrizio Barzantip oqaatigaa, Nipilersukkammi tusarnaarneqarneri malillugit annikitsuararsuarmik nipilersortartunut akissarsissutigineqartarput.
Tusarnaarusuttummi tusarnaarsinnaanissaat pingaarneruvoq, taama oqarpoq Fabrizio Barzanti.
-Kalaallit nipilersukkatsinnik tusarnaaqqissinnaalernerat pingaarnerpaavoq. Sinneri soqutaavallaanngillat. Tusarnaarneqarnerpaatut inisseqqereersimasugut takuneqarsinnaalereerpoq. Saqqummersitsinermi ullut siulliit marluk pingasulluunnit tusarnaaneqarnerpaaniinneq naliginnaasuuvoq.
