Aaja Chemnitz: Kalaallit Danmarkimiittut inuiaqatigiinnut akulerutsitsinermi pikkorissarneqarnissaat pisariaqartoq
Kalaallit passianni ”inuiaassutsip” ataani ”danskimik” allassimavoq. Taamaakkaluartoq kalaalerpassuit Danmarkimut nooreernerminni aalajangersimasumik suliffissarsinissartik aamma pitsaasumik inuuneqarnissartik ajornakusoortittarpaat.
Tamanna isummersuisit Justitiap nalunaarusiaani nutaami atuarneqarsinnaavoq. Nalunaarusiap ilaatigut ersersippaa kalaalerpassuit Danmarkimi pisinnaatitaaffii uniorlugit pisortanit ikiorserneqarneq ajortut.
Tassami kalaallit 25-t 60-illu akornanni ukiullit Danmarkimi najugaqartut taamaallaat 35 procentingajai taamaallaat suliffeqartut qallunaallu 80 procentingajai suliffeqartut VIVE-mi kisitsisit 2015-imeersuni ersersinneqarpoq. Ullumikkullu naatsorsuutigineqarpoq kisitsisit taamaaginnartut.
Aamma atuaruk Nalunaarusiami inerniliussaq: Danmarkimi kalaallit ikiortariallit oqartussanit sullinneqarnerlupput
Tamannalu iliuuseqarfigineqartariaqarpoq, folketingimi ilaasortaq Aaja Chemnitz, Inuit Ataqatigiinneersoq, taama isumaqarpoq.
- Inuit Kalaallit Nunaanni sulisartuusimasut Danmarkimut pigaangamik suliffissaqartinneqarneq ajortut eqqumiippoq, taamaattorli Danmarkimi suliffeqarfiit sulisussaaleqinerarput, taanna oqarpoq.
Qallunaatut pikkorissarneq aamma ilinniakkat akuerineqarnissaat
Qallunaat 2023-mut aningaasanut inatsisaanni kalaallit amerlanerusut Danmarkimi sulilersinneqarnissaannut 2025-imut 2026-imullu 3 miliuunit koruunit immikkoortinneqarsimapput.
Taakkualu, Aaja Chemnitz naapertorlugu, danskit kommuniisa arlallit innuttaasunik kalaaliusunik pikkorissartitsinissaannut atorneqartariaqarput. Inuiaqatigiinnut akulerutsitsinermut pikkorissaanerit, soorlu Danmarkimut nunasisut pikkorissarfigissallugit pisussaaffigisaattut pikkorissaatigineqartartunut assingusut.
Aamma atuaruk Attaveqatigiinnernut, isiginnaagassiamut pisimasuinnik tunngavilinnut kalaallillu ilinniartut ineqarfiinut aningaasat
Pikkorissaanermi ilaatigut qallunaatoorneq ilinniartitsissutigineqartarpoq, akissarsiaqarluni suliffimmik misiliisoqartarpoq taavalu nunagisami ilinniakkat pikkorissarfigisimasallu naammassisimasat Danmarkimi akuersissutigineqartarlutik.
- Nunatsinniit Danmarkimut pigaanni pappialakkut danskisut innuttaassuseqartarpugut, tamannali ulluinnarni ileqqunut atuutinngitsoq paasisariaqarparput. Kalaallit sulilersinneqarnissaannut immikkut suliniuteqartoqarnissaa pisariaqartinneqarpoq.
Danmarkimut nunasisut assigalugit kalaallit inuiaqatigiinnut akulerunneqarnissaannut pikkorissartarnissaat danskit naalakkersuisuisa itigartitsissutigaat.
Nunasisunut inuiaqatigiinnut akulerutsitsinermut pikkorissartitsineq ukiunik marlunnik sivisussuseqarpoq. Kalaallinut Danmarkimiittunut pikkorissarneq ukiumik ataasiinnarmik sivisussuseqartariaqarpoq, taama Aaja Chemnitz siunnersuuteqarpoq.
Kalaallit amerlanerusut sulilersinneqarneratigut immikkoortitsisarneq aaqqiivigineqassaaq
Aningaasanut inatsimmit kalaallit amerlanerusut sulilersinneqarnissaannut Danmarkimi kommunit sorliit aningaasanik pissarsissanersut suli inissinneqanngilaq.
Aamma qanorpiaq kommunit innuttaasut kalaaliusunut attaveqarnissaat pillugu Aaja Chemnitzip akuleruffigerusunngilaa.
Kalaallilli amerlanerusut sulilersinneqarnissaannut suliap Danmarkimi kalaallinik immikkoortitsisarnermik annikillisitsissasoq taassuma neriuutigaa.
- Nikanarsaataasumik assigiinngisitsisoqartarnera aamma paasineqartariaqarpoq. Assersuutigalugu qinnuteqaammi Malimmik imaluunniit Madsimik ateqaraanni assigiinngissuteqartarpoq. Suliffissarsiornermi unammillernartut annerpaartaat ilarigaat inunniit tusartakkama ilagaat.
