Danskit aningaasanut inatsisaat: Attaveqatigiinnernut, isiginnaagassiamut pisimasuinnik tunngavilinnut kalaallillu ilinniartut ineqarfiinut aningaasat

Nunarput Atlantikup avannaanut aningaasaliissutinit danskit aningaasanut inatsisaanni isumaqatigiissutigineqartunit pissarsinerpaassaaq.

Allattoq Helle Nørrelund Sørensen

apriilip 26-at 2023 12:04

Nutserisoq Connie Fontain

Nunarput danskit naalagaaffiata ukioq manna ukiunullu tulliuttunut pingasunut Atlantikup avannaanut aningaasaliissutaanit pissarsiaqarnerpaasussatut allassimavoq.

Aningaasaliissutit 30 millionit koruuniupput, taakkulu danskit ukioq manna aningaasanut inatsisissaanni partiit Christiansborgimi ataasinngornermi isumaqatigiissutaata ilaatut agguaanneqarput.

Nunatsinnit Københavnimi Aalborgimi ukioq siullermi ilinniartunut ineqarfiit nutaat marluk 6 millionit koruuninik ilaatigut aningaasaliiffigineqarput.

Kalaallit ilinniartut nutaat tikerlaat Aarhusimi Odensemilu ullumikkut neqeroorfigineqartarput, allarpassuilli pingaartumik illoqarfiit pingaarnersaanni inissarsiuminaatsitsisarlutik.

Tamannali danskit ilinniarfeqarfissuini marlunni maanna allanngortinneqalerpoq. Kalaallit ilinniartut ineqarfiat siulleq Aalborgimi aasamut ammassaaq, allalu Københavnimi aappaagu ammassalluni.

Danskit aningaasanut inatsisaanni 2023-p ilaatut Atlantikup avannaanut aningaasaliissutit ukiunut sisamanut katillugit 120 mio. koruuniupput.

Aningaasat nunatsinnut tunngasut, ima agguataarsimapput:

Atlantikup avannaani imaani ilisimatusarneq - 15 mio. kr.
Naalagaaffeqatigiinni inuusuttut akornanni kulturikkut suliaqarneq (Suliniut-Sjómaq) - 12 mio. kr.
Qanigisanut toqujartortunik paarsinissamut sulinngiffeqarneq - 2,5 mio. kr.
Kalaallit Nunaanni pisimasut, ullumikkut pisut siunissarlu pillugit isiginnaagassiaq piviusuinnik tunngavilik - 9,5 mio. kr.
Kalaallit Nunaanni attaveqaatinik pitsanngorsaaneq - 9,5 mio. kr.
Aalborgimi Københavnimilu ilinniartut ineqarfiinik pilersitsineq - 6 mio. kr.
Operation Dagsværk INUA - 6 mio. kr.
Qaammataasaq atorlugu ikkarlunnik assiliartalersuineq - 4,4 mio. kr.
FoodLad Kujataanut tapiineq - 4 mio. kr.
Kalaallit Nunaanni kulturikkut aningaasaliissutit - 4 mio. kr.
Nunat tamalaat akornanni suliniaqatigiiffimmut ICC-mut tapersiineq - 3 mio. kr.
Danmarkimi kalaallinik innuttaasunik kisitsineq - 3 mio. kr.
Danmarkimi kalaallit suliffeqarnisssaanut suliniutit pitsanngorsarnerat - 3 mio. kr.
Inatsisilernermi oqaatsinik kalaallisut ineriartortitsineq - 3 mio. kr.
Kalaallit Nunaanni angutinut nakuusernermik pinaveersaartitsinermik katsorsaaneq - 2 mio. kr.
Kalaallit Ilisimatusarnermik siunnersuisoqatigiivinut Ph. d-tut imaluunniit post.doc.-itut ilinniarnermut aningaasaliineq - 1,5 mio. kr.
Peqatigiiffinnut MAPI-mut aamma Mentor Immanuelimut tapiissutit - 1,5 mio. kr.
Atuakkap "Imperiets Børn"-ip kalaallisuunngortinneqarnissaa - 0,1 mio. kr.
Paasissutissarsiffik: Danmarkip 2023-mut aningaasanut inatsisaa

Allisiguk

ICC-mut tapersiinissamut tassa nunatsinni pisimasut, ullutsinni pisut siunissamullu tunngasumik piviusuinnik tunngavilimmik isiginnaagassiornissamut aamma inatsisilerinermut taaguutinik kalaallisuunngortitsinissamut aamma aningaasassarsisoqarpoq.

Aamma peqatigiiffiit MAPI – nunatsinni meeqqanik tapersersuisoq aamma Mentor Immanuel danskit aningaasanut inatsisaanni aamma ilaapput, taakkulu ukioq manna aappaagulu ataatsimut 1,5 millionit koruunit avissavaat.

Aningaasaliiffiit allattorsimaffianni kalaallit angutit akornanni nakuusernermik pinaveersaartitsinermi katsorsaanerit aamma nunatsinni sinerissap qanittuani nunap ilaanik assitalersuinermut aningaasat taaneqarsinnaasut ilagaat.

Siumup IA-llu danskit aningaasanut inatsisissaanut isumaqatigiinniarnermut kissaatitik ilarpassui ukiup siuliinut sanilliullugit ukioq manna ataqatigiissaarpaat.

Aamma atuaruk Siumut: Nunatsinni susassaqarfiit naalagaaffiup suli akisussaaffigisai isumaqatiginninniutigisinnaasariaqaraluarpagut

- Suliniutinit qulinit sisamat Siumup suleqatigineratigut iluanaarutissat annertusineqarput, ataatsimoorluta nunatsinnut pitsaasumik angusaqarsinnaanerput nuannaarutigaara, Aaja Chemnitz oqarpoq.

Aki-Matilda Høegh-Damip Siumumeersup angusat aamma nuannaarutigai.

- Aningaasaliissutinik nunatsinni Danmarkimilu kalaallinut suliniutinut angusaqaataasinnaasunik qulakkeerinissarput uagutsinnut pingaaruteqarpoq. Suliniutit kalaallinut pissutsinut assigiinngitsutigut kivitseqataassapput, tamannalu ilorrisimaarutigaara, taanna oqarpoq.