Pan Am Kalaallit arnartaat Pan Am-imi peqataanngitsoortut

Pan Am 2017 Canadami aasaru juunimi pisussaagaluarpoq, Canadalli peqataaniarnani nalunaarnerani pissartanngorniuunnerit Argentinamut nuunneqarnikuullutik. Tamatuma kingunerisaanik PATHF aalajangerpoq nunat 12-it peqataanatik quliinnaat peqataassasut. 

Taama aalajangerneq tuaviuussamik pivoq, tamatumalu kingunerisaanik kalaallit arnartaasa peqataaniarlutik nalunaarnerat itigartiinnarneqartariaqarsimalluni. GHF, Kalaallit Assammik Arsartartut Kattuffiat taama nalunaaruteqarpoq. 

- Ajoraluartumik PATHF-imit ilisimatinneqarpugut allatsinnerput akuerineqarsimanngitsoq. GHF-ip suleriaaseq malillugu aningaasassarsereerluni unammisartut allatsikkaluarpai, GHF ilisimatitsivoq. 

Kalaallit unammisartuisa Pan Am 2017-imut peqataanissaannut aningaasassat GHF-ip pissarsiarisimagaluarpaat, PATHF-illi pilersaarutinik allannguinerata kingorna peqataasinnaajunnaarsimallutik. 

Nukittunerullutik piareersimanerullutillu uteqqinniartut

Nunanut allanut unammisartut sungiusaasuata, Johannes Grothip, Pan Am 2017-imi peqataanngitsoornertik ajuusaarutigaa, taamaattorli suleriaqqinnissamut periarfissatut isigalugu. 

- Sapaatit akunnerpassui utaqqereerluta maanna tassa paasivarput, siumullu isigisinnaalerpugut, Johannes Groth oqarpoq, maannalu siumut isigaluni sulineq ingerlaqqissinnaalersoq oqaatigalugu. 

Nunanut allanut unammisartut aqutsisuata Najaaja A. Lyberthip Pan Am-imut peqataanngitsuulerneq pikkorinnerulernissamut, nukittunerulernissamut piareersarluarnerunissamullu periarfissatut isigaa. Ukiummi marluk qaangiuppata unammisaqattaarnerit, Norca, aallartissapput, taannalu aqqutigalugu Pan Am-imut annguttoqarsinnaalluni.

- Puerto Ricomi Norcami peqataanerput ilinniarfioqaaq. Piumasaqaatit qaffasipput, pikkoriffiginerusariaqakkagullu ukiuni marlunni sungiusassallugit periarfissaqalerpugut. Pimoorussilluta sungiusarnissamut qilanaarpugut, Najaaja A. Lyberth oqarpoq.