Amerikamiut præsidentiata USA-p Kalaallit Nunaat pisariaqartikkaa aammaarluni oqaatigereeraalu folketingimut ilaasortaq IA-meersoq, Aaja Chemnitz ernumassuteqarluni qisuariaateqarpoq.

Donald Trump Air Force One-imik ataasinngornermut unnukkut angalasoq Kalaallit Nunaannut tunngatillugu iliuuseqarniarnersoq tusagassiortumit aperineqarami taama nalunaaruteqarpoq.

- Kalaallit Nunaata qaammatit marluk missaat qaangiuppata eqqarsaatigissavarput. Kalaallit Nunaat ullut 20-t qaangiuppata oqaluuseritigu, præsidenti akivoq, taassumalu USA-p Kalaallit Nunaat pisariaqartikkaa erseqqissaatigaa.

USA-p Kalaallit Nunaat pisariaqartikkaa Donald Trumpip ukiuni kingullerni arlaleriarluni oqaatigaa. USA-lli Venezuelamut maanna saassussineranit ulloq ataaseq qaangiuttoq oqaaseqarpoq.

Tamanna pissutigalugu oqaaseqarneri immikkut ernumanartut, Aaja Chemnitz isumaqarpoq. IA-mit politikerip oqarnera naapertorlugu Folketingip Amerikamiut sakkutuuliinissaata piviusunngoratarnissaanut upalungaarsimanissaq pillugu naalakkersuisunik oqaloqateqarnini sukannernerulersittariaqarpaa.

- Pissutsini matumani Kalaallit Nunaata pissutsinik ajornerpaanik pisoqaratarnissaanut piareersarnissaa pingaaruteqarpoq – upalungaarsimaneq tamanna nunarsuarmi tamarmi piareersarfigineqarpoq, tamanna Amerikamiut Kalaallit Nunaannut sioorasaarinerminik piviusunngortitseratarnissaannut aamma pingaaruteqarsinnaavoq, Aaja Chemnitz oqarpoq.

Nunarsuaq allatut isikkoqartoq

NATO-p Kalaallit Nunaannut illersuinissamut pilersaaruteqarpoq. Tamanna Issittumi Sakkutooqarfiup pisortaata, Søren Andersenip Ritzau-imit siorna juunimi apersorneqarnermini erseqqissaatigaa.

Aaja Chemnitzili aalajangiisussaagaluaruni pissutsini attaveqarfiit atuussinnaajunnaassagaluarpata upalungaarsimanermut pilersaarummik ilisimasaqarlualernissaat innuttaasunut erseqqissaatigerusuppaa. 

- Nunarsuup allarluinnartunik isikkoqarnissaanut piareersartariaqarpugut. Oqaaseqaatit nunatsinneersut Trumpip tungaaniit ataqqineqannginnerat ersarilluinnarpoq. Taamaammat innuttaasunut toqqissisimanermik pilersitsinissamut iliuuseqarnissarput pingaaruteqarpoq, Aaja Chemnitz oqarpoq.

Suliassaq kivissinnaanngikkaa

Amerikamiut præsidentiata Air Force One-imi apersorneqarnerani siusinnerusumi oqaatigineqartumi danskit Kalaallit Nunaannut illersuinerat isornartorsiorpaa.

- Kalaallit Nunaanni sumi tamaani Kinamiut russillu umiarsuaat maannakkorpiaq takussaaqaat. Nunatta isumannaatsuunissaa eqqarsaatigalugu Kalaallit Nunaat pisariaqartipparput. Danmarkip suliassaq tamanna nammineq kivissinnaanngilaa, Trump oqarpoq.

Oqaaseqarnerit Chemnitzip oqarnera naapertorlugu “ingattarsernerupput” iliuutsillu taakku nalinginnaasumik iliuuserineqartartut avataaniittunik Trumpip atuineranut ilisarnaataallutik, taanna oqarpoq.

Aaja Chemnitz nangippoq:

- Taamaammat USA ukiup ataatsip siulianitulli iligisarinerupput apeqqusertariaqarparput. Uanga USA-mut pituttorsimalernissara kissaatiginngilara.