USA-p præsidentia Donald Trump Kalaallit Nunaat pillugu iliuuseqarumaarnissani naatsorsuutigineraa sapaatip unnuaani aperitikkami akiumanngilaq.

Tamanna præsidentip timmisartuani Air Force One-mi pivoq.

Tassani Trump Kalaallit Nunaat pillugu "iliuuseqarnissaminik" naatsorsuutiginninnersoq tusagassiortumit aperineqarpoq.

- Kalaallit Nunaat eqqartornianngilara. Venezuela, Rusland Ukrainelu eqqartorniarpakka, Trump akivoq.

-  Kalaallit Nunaat qaammatit marluk qaangiuppata isumakuluutigissavarput. Ullut 20-t qaangiuppata oqaluuseriniartigu, præsidentip timmisartorsuani Air Force One-miitilluni Trump oqarpoq.

Tiguaanissarput EU-p pisariaqartippaa

Trumpip piffissat taakku sooq eqqartornerai erseqqinngilaq.

Præsidentilli tusagassiortup apeqqutaa akiumanngeriarlugu Kalaallit Nunaat eqqartorpaa.

- Kalaallit Nunaalli pillugu ima oqarusuppunga. Nunatta isumannaatsuunissaanut atatillugu Kalaallit Nunaat pisariaqartipparput, Trump oqarpoq.

- Kalaallit Nunaanni sumi tamaani Kinamiut russillu umiarsuaat maannakkorpiaq takussaaqaat. Nunatta isumannaatsuunissaa eqqarsaatigalugu Kalaallit Nunaat pisariaqartipparput. Danmarkip suliassaq tamanna nammineq kivissinnaanngilaa, taanna oqarpoq.

- (Kalaallit Nunaannik, aaqq.) tiguaanissarput EU-p pisariaqartippaa. Tamannalu nalunngilaat, præsidenti nangilluni oqarpoq.

Trumpip 2019-imi præsidentitut atuuffimmini siullermi Amerikamiut Kalaallit Nunaannik piginnittussaanerat eqqartulerpaa.

Novembarimi aappassaanik qinigaareernermini tamanna aamma arlaleriarluni eqqartorpaa.

Tusagassiutinut The Atlantic-imut oqarasuaatikkut sapaammi apersorneqarnermini aamma taamaaliorpoq.

- Kalaallit Nunaat pisariaqartilluinnarparput, tusagassiivik naapertorlugu Trump oqarpoq.

Siorasaariunnaarnissamik kaammattuisoq

USA-lli Kalaallit Nunaannik tiguaanissaanik oqallinneq isumassaqanngilluinnartoq, ministeriuneq Mette Frederiksen (S) sapaatiummat oqarpoq.

USA naalagaaffeqatigiinnermi nunat pingasuusut arlaannik tiguaanissaanut tunngavissaqanngitsoq, Frederiksen oqarpoq.

Aammattaaq USA qanimut suleqatigisimasaminut sioorasaariunnaaqqullugu kajumissaarivoq. Aamma nunap inuiaallu tuniniarneqannginnermik erseqqissumik oqarsimanerat erseqqissarpaa.

Trump danskit ministeriunerata sapaatiummat oqaaserisai pillugit sapaammi unnuakkut aperineqanngilaq oqaaseqarfiginninnanilu.

/ritzau/