Kalaallit pinerluuteqarsimasunut inissiisarfinni sulisut Danmarkimi suleqatiminnit akissarsiakinnerupput
Nunatsinni Danmarkimilu pinerluuteqarsimasunut inissiisarfinni sulisut akissarsiaat assigiinngillat, tamannalu iluarsineqartariaqarpoq, Siumut sinnerlugu Folketingimut ilaasortaq Doris Jakobsen taama isumaqarpoq.
Doris Jakobsenip Folketingip Kalaallit Nunaannut tunngasunut ataatsimiititaliaa Nunatsinnut angalaqatigeqqammerpaa, ataatsimiititaliamut ilaasortat angalanerminni ilaatigut Ilulissani Nuummilu pinerluuteqarsimasunut inissiisarfiit pulaarpaat.
- Angalareernitta kingorna ministerimut apeqquteqaateqarpunga (Aaqq. Karen Hækkerup), Nunatsinni pinerluuteqarsimasunut inissiisarfinni sulisut aamma Danmarkimi taama suliaqartut assigiimmik akissarsiaqalernissaat apeqqutigalugu, Doris Jakobsenip allappoq nangillunilu:
- Pinerluuteqarsimasunut inissiisarfinni sulisut Danmarkimi uleqatimisulli akissarsiaqartinneqartariaqarsoraakka.
Ilinniartitaanerup sivikinnernera pissutaasinnaasoq
Danmarkimi inatsisinik atortitsinermut ministeri Karen Hækkerup KNR-imit attaveqarfiginiaraluaratsigu iluatsinngilarput. Pinerluttunilli Isumaginnittoqarfiup pisortaata Hans Jørgen Engbop oqaatigaa, Danmarkimi parnaarussivimmi sulisututut ilinniartitaanerup Nunatsinnilu pinerluuteqarsimasunut inissiisarfinni sulisutut ilinniartitaarnerup sivusussusiisa assigiinnginnerat tamatumunnga pissutaaratarsinnaasoq.
- Kalaallit Nunaanni Danmarkimilu akissaatitigut assigiinngissutaasoq suliffeqarnerup iluani nalinginnaasuuvoq. Tassungalu aamma ilanngullugu Danmarkimi parnaarussivimmi sulisutut ilinniartitaaneq sivisunerungaatsiarluni. Ukiunimmi pingasunik sivisussuseqarpoq Kalaallit Nunaanni ukiunik marlunnik sivisussuseqaaannarluni. Akissarsiat assigiinngissuteqarnerinut tamanns pissutaaqataasinnaavoq, Pinerluttunik Isumaginnittoqarfiup pisortaa Hans Jørgen Engbo taama oqarpoq, nangillunilu:
Sivitsorneqarsinnaanissaa neriuutigaa
- Oqaatigerusuppara, Kalaallit Nunaanni ilinniartitaanerup Danmarkimi ilinniartitaanertulli sivisutigilernissaa kissaatigigaluarakku - assigiissaarisoqarluni. Kalaallit Nunaanni Pinerluuteqarsimasunut inissiisarfinni sulisut Danmarkimi taama suliaqartut akissarsiaannut qanillattortinnissannut tamanna tunngavilersuutigineqarsinnaassagaluarmat. Tamanna siunissaq ungasinnerusoq eqqarsaatigalugu anguneqarsinnaassasoq neriuutigaara. Tamannami aningaasanik aamma naleqarmat, Hans Jørgen Engbo oqarpoq.
