Ministeri: Kalaallisut oqalussinnaasut Danmarkimi naalagiartoqarnerani ikiuussinnaapput
Aarhusimi palaseqarfimmi palasi, Oline Berthelsen ullumikkut ulapingaatsiartarpoq.
Taanna kalaallinut Danmarkimi najugaqartunut 16.000-inut palasiusarpoq. Taamaammat kuisittoqarnissaanut, katittoqarnissaanut, ilisisoqarnissaanut allatigulluunniit oqaluffimmi kalaallisut ingerlanneqartussani pisussaqartillugu ulapingaatsiartarpoq.
AAMMA ATUARUK Folketingimi takkuttut ikippallaarnerat kalaallit peqatigiiffiata isornartorsioraa
Naalakkersuisut Nunatsinnilu biskoppeqarfik Danmarkimi kalaallinut ilagiinnut saniatigut allamik palasissarsiortuarsimagaluarput - iluatsinngitsumilli - matumanilu Nunatsinni palasissaaleqineq ilaatigut pissutaavoq.
Maannali allatut aaqqiissutissaqalerunarpoq. Tamanna danskit ilageeqarnermut ministeriata, Mette Bockip Inuit Ataqatigiit sinnerlugit folketingimi ilaasortamut, Aaja Chemnitz Larsenimut akissutaani allassimavoq.
- Ilagiinni naalagaaffiup tapersersugaanni palasit palasiunngitsunik naalagiartoqarnerani oqaluffinnilu pisoqarnerani oqaluussitsisinnaanngillat, Mette Bock allappoq.
Palasi oqaluffimmi aallaqqaasiisassasoq
Malittarisassaq danskit oqaluffiinik atuinermut inatsimmeerpoq, taannalu naapertorlugu palasi oqaluffimmi ikiuisartussamik, ajoqimik toqqaasinnaavoq, ilageeqarnermut ministereqarfik paasissutissiivoq.
Ajoqip aallaqqaasiutitut naggasiutitullu qinnutit isumagisinnaavai palasillu akuersineratigut aamma oqaluussisinnaalluni.
Oqaluffimmili alterip atorneqarnera taamaallaat palasip isumagisinnaatitaagaa, ministerip akissutaani allassimavoq.
AAMMA ATUARUK Malittarissaq immikkut ittoq kalaallit peqatigiiffiata atorluarniaraa
- Naalagiarnermili oqaluussinissaq palasimit isumagineqarnissaa piumasaqaataanngilaq, oqaluussinnginnermili oqaluussereernermilu alterimi pisut palasimit, naalagiarnermi akisussaasumit isumagineqassapput.
Aaja Chemnitz Larsenip akissut nuannaarutigaa kalaallillu ajoqip naalagiartitsisinnaalernissaanut periarfissaq “ingerlattariaqartutut” isigalugu, iliuuserineqartartoq taanna Savalimmiuni atugaangaatsiarpoq.
Inuit Ataqatigiit sinnerlugit folketingimut ilaasortap Naalakkersuisut Danmarkimilu Ilageeqarnermut ministereqarfik danskit palasiisa ilagiillu ajoqinut malittarisassaanik sammisaqarnissaat maanna ujartorpaa.
AAMMA ATUARUK Kalaallit ilageeqalernissaat ilageeqarnermut ministerip taperseraa
