Malittarissaq immikkut ittoq kalaallit peqatigiiffiata atorluarniaraa
Suleqatigiissitap, maanna tassaalersup Peqatigiiffik Kalaallit Ilagiit Danmarkimi, palasinik kalaallisut oqaasilinnik amerlanerusunik atorfinitsitsisoqarnissaa, taamatullu aamma ilagiinnik amerlanerusunik pilersitsisoqarnissaa 2009-miilli ilungersuutigaa.
Ilageeqarnermullu ministerinik Folketingimilu ilageeqarneq pillugu oqaaseqartartunik arlalinnik ataatsimeeqateqartaraluarlutik tamanna iluatsissinnaasimanngilaat.
Suliaq politikkikkut suliassanngorsimavoq, kimit aningaasalersorneqarnissaa pillugu, Peqatigiiffik Kalaallit Ilagiit Danmarkimimi siulersuisuni ilaasortaq, Bitha Metelmann, taama nassuiaavoq.
- Paasitinneqartuarpugut Namminersorlutik Oqartussat tusarniaqqaarneqassasut. Tamannalu kukkunertut isigaarput, maanimi Danmarkimi akileraartartuuvugut Danmarkimilu ingerlatsisoqartussaalluni. Nunarput ilagiinnut pineqartunut attuumassuteqanngilaq, KNR-imut taama oqarpoq.
PAASISSUTISSAT:
Palasit kalaallisut oqaasillit Danmarkimi ullumikkut marluupput. Aappaa Namminersorlutik Oqartussanit aningaasalersugaavoq kalaallinillu Danmarkimiikkallartunik sullissisuulluni.
Aappaa danskit ilageeqarnermut ministereqarfiannit Arhus Stiftip ataani atorfeqartitaavoq, Danmarkimilu kalaallit najugaqavissut tamaasa sullitassaralugit.
Ilagiit sinnissaat pillugit inatsimmi § 5: "Naligiissitaanermut ilageeqarnermullu ministeri biskoppimik isumasiuereernermini aalajangiisinnaavoq inunnut immikkut ilagiiusunut ilagiit sinniissaannik pilersitsisoqassasoq. Ilagiit sinniisaat taama ittut katitigaanerannut qanorlu pisinnaatitaanerannut malittarisassat Naligiissitaanermut ilageeqarnermullu ministerimit aalajangersarneqassapput."
Najoqqutarisaq: Retsinformation.dk
Paragrafi ilaatigut tusilartunut atorneqartoq
Taamaammat peqatigiiffiup siunnersuutigaa danskit ilageeqarnermut ministeriata ilagiit sinniisaat pillugit danskit inatsisaanni paragrafi atorluarsinnaagaa.
Paragrafimi tassani allassimavoq ilageeqarnermut ministeri biskoppi peqatigalugu inunnut immikkut ittumik ilagiiusunut ilagiit sinniisaannik pilersitsinissamik aalajangiisinnaasoq.
Malittarisassaq taanna atorlugu Danmarkimi tusilartunut ilagiit sinniisaannik immikkoortunik pingasut ilaatigut pilersitsisoqarsimavoq. Taamatullu iliortoqarsinnaanera misissorneqarsinnaalluartoq, Socialdemokraatit ilageeqarneq pillugu oqaaseqartartuata, Karen Klintip, oqaatigaa.
- Kalaallit Danmarkimiittut oqaatsitik atorlugit ilageeqarnikkut soorunami kiffartuunneqartariaqarnerat ammaffigiuaannarnikuuara. Soorlu aamma Danmarkimi tusilartut namminerisaminnik ilageeqarlutillu palasinit ussersuutit atorlugit naalagiartinneqartartut.
AAMMA ATUARUK Præsteopgaver i Danmark skal fordeles bedre
Karen Klintip erseqqissaatigaa tusilartunut naleqqiullugu kalaallit ilagiit sinniisaannut allaanerusumik aaqqissuussisoqarsinnaasoq.
- Aaqqissuussineq qanoq ittuussanersoq oqaatigisinnaanngilara. Isumaqarpungali kalaallit Danmarkimiittut pitsaasumik kiffartuunneqarnissaannut aaqqissuussineq ilinniarfigisinnaagipput.
Karen Klintip siunnersuut ilageeqarnermut ministerimut Mette Bockimut saqqummiunniarpaa.