Folketingimi takkuttut ikippallaarnerat kalaallit peqatigiiffiata isornartorsioraa
Aviisi Jyllands-Posten taama allaaserisaqarpoq.
Peqatigiiffimmi Kalaallit Ilagiit Danmarkimi siulersuisut Folketingip Ilageeqarnermut ataatsimiititaliaanik ataatsimeeqateqarnissamik ukioq manna maajip qulingani isumaqatigiissuteqarput, peqaatigiiffiup Danmarkimi ilagiinni palasimik kalaallimik ataatsimik atorfinitsitseqqittoqarnissaanik anguniagaqarnera oqaluuserineqartussalluni.
Ataatsimiititaliamili ilaasortaq ataasiinnaq - siulittaasup tullia Christian Langballe Dansk Folkepartiimeersoq - takkuppoq.
- Uatsinnik suusupaginninneruvoq, Henriette Berthelsen, peqatigiiffimmi Kalaallit Ilagiit Danmarkimi siulittaasoq Jyllands-Postenimut taama oqarpoq.
AAMMA ATUARUK Malittarissaq immikkut ittoq kalaallit peqatigiiffiata atorluarniaraa
Aviisi naapertorlugu Folketingimi nalunaarusiami atuarneqarsinnaavoq innuttaasut peqatigiiffiillu Christiansborgimut oqaloqatiginnikkiartoraangata politikerit takkuttartut nalinginnaasumik ikiliartortut. Ukiut marluk matuma siorna politikerit agguaqatigiissillugit arfineq-pingasut ataatsimiititaliat ataatsimiinnerinut takkupput, ukiumilu kingullermi ataatsimiigiartut arfineq-marluupput.
Tamatumunngalu peqatigitillugu ataatsimiititalianut sassartut amerliartorput.
Folketingip siulittaasuata, Pia Kjærsgaardip (DF), ajornartorsiutaanera nassuerutigaa, aaqqiissuteqarfiginissaalu ajornakusoornerarlugu.
Tamatuma nalinginnaaleriartornera qinikkanit arlalinnit illersorneqarpoq, ilaatigut Socialdemokraatit assartuussineq pillugu oqaaseqartartuannit Lennart Damsbo Andersenimit, taanna nassuiaavoq politikerit amerlanertigut ataatsimiititaliani arlalinni ilaasortaasartut ataatsimiinnerillu ilaatigut qaleriissinnaasartut.