Instituttip pisortaa: Kalaallisut oqaasilerinermik ilinniartitsineq ilisimatusarnerlu siunissarloqaat
- Pissutsit uagutsinnut aamma unammillernartorujussuusut uagut aamma ernumassutigaagut.
Ilisimatusarfimmi Kulturimik, Oqaatsinik, Oqaluttuarisaanermillu Instituttimi pisortaq, Inge Seiding oqarpoq. Nuummi GUX-imi kalaallisut ilinniartitsinissamut ilinniartitsisussaaleqingaatsiartoqarnera pillugu KNR-ip saqqummersitaata kingorna taama oqaaseqarpoq.
Inge Seidingip ilisimatusarfimmi kalaallisut atuartitsinissat Nuummi GUX-imitulli taamaatittariaqarsimanagit oqaatigaa. Taassumali sulisussaaleqineq pissutigalugu kalaallisut oqaatsinik, atuakkialerinermik tusagassiuutilerinermillu ilinniartunut ukiumut pilersaarusiorniarneq ajornakusoortarnerarpaa.
- Pitsaassuseq akiliutigisariaqartariaqassanerlugu ernumanarsinnaavoq. Uagutsinnut tunngatillugu atuartitsinerni kalaallisut suliaqarsinnaanissaq ilinniartunut periarfissaatinniartarparput. Tassa imaappoq ilinniartut kalaallisut oqaatsit atorlugit misilitsissinnaatillugit, intituttip pisortaa oqarpoq.
Pitsaassuseq akigisariaqassasoq
Taassuma ilanngullugu oqaatigaa:
- Tamanna neqeroorutigisinnaanngikkutsigu pitsaassuseq akigalugu avataanit kalaallisoorsinnaanngitsunik tikisitsisariaqassaagut.
Maannakkut taamaappa?
- Maannakkut neqeroorutigisinnaasatsinnit kalaallisut ilinniartitsinerorusuppugut, ilitsersuerusuppugut allaaserinnitsitserusullutalu.
Nuummi GUX-imi rekorip, Hanne Larsenip kalaallisut atuartitsinissamut ilinniarnertuunngorniarfimmi ilinniartitsisussanut pilerinarsaaniarneq akissarsiaqartitsineq pissutigalugu ajornakusoornerarpaa.
Inge Seiding aamma taama misigisimavoq. Ilisimatusarfiup akissarsiaqartitsinerit unammillersinnaanngilai. Tamatuma saniatigut kandidatitut naammasseqqammersut tigujumaneqartorujussuupput.
Ilungersunarluinnartumi inissisimasoq
Oqaasilerinermik, atuakkialerinermi tusagassiuutilerinermillu ilinniartut affaat sinnerlugit ilinniakkaminnik naammassinninneq ajorput. Tamanna ilinniartut ilaasa ilinniarnermi ingerlanerani suliffeqarnermi sulisussaaleqisunit atorfinitsinneqartarnerannik ilaatigut pissuteqarpoq.
Taannaannaanngilarlu. Ilinniartut ilinniakkamik ukiumut naammassisartut 2011-mili agguaqatigiissillugu pingasuupput.
- Isumaqarpunga ilungersunarluinnartoq, Inge Seiding oqarpoq, tamannalu attanneqarsinnaanngitsoq erseqqissaatigaa.
Ineriartorneq tamanna aaqqiivigineqanngippat ajornerpaamik qanoq kingunerluuteqassava?
- Siunissagissaanngitsorujussuussaaq. Immikkoortortamik atasinnaatitsinngikkutta tamarmi ajalusoorluinnassaaq, instituttip pisortaa oqarpoq.
Naalli unammillernangaatsiaraluartoq Inge Seidingip instituttimiittullu sinnerisa 2024-mut ilinniakkap aaqqissuunnera nutaaq atorlugu tamanna mumisinniarsaraat.
Oqaatsinik pingaarnerutitsiviuvoq, instituttillu pisortaata GUX-imit ilisimatusarfimmut ikaarsaariarnermut atatillugu sungiussinissap eqqarsaatigineqarnissaa ilaatigut qulakkeerniarsaraa.
