Kalaaleq inoqatinut attaveqaatitigut ilisimaneqarluartoq 1 millioninik malinnaasoqalersoq
Inoqatinut attaveqaatit Youtube, Facebook, Instagram Tiktokkilu ammarukkit, life is amazing tulliani takuss!
Oqaatsit taakku Q’s Greenlandip nunarput pillugu videoliaani takussaajuarput.
Videolianik nuannarineqarluartunik saqqummersitsisartup, Qupanuk Olsenip anguniakkani tassa millioninik malinnaasoqalernissani anguaa.
- Nuanneqaaq pilluarnaqaaq. Eqqissiallaqqasutut misigisimaqaanga. Una millioni pissangaginikuugakku ukioq manna angussanerlugu angussannginnerluguluunniit, taava massakkut angoreerlugu nuanneqaaq, taanna oqarpoq.
Qupanuk Olsenip videoliani arlallit nunarsuaq tamakkerlugu takuneqarsimasut nassuiaatigaa. Assersuutigalugu videoliani sapaatit akunneri marluk matuma siorna saqqummersitani 8 millioninit takuneqarsimavoq.
- Taamatut iluatsitsilluaraangama takuneqarujussuaraangata videot, malinnaasukka amerlatsipiloortarput.
Nunarsuarmit tamarmit malinnaasoqartoq
Malinnaasorpassuit nunanit allaneersuupput, taakkulu nunarput pillugu qanoq paasisaqarusunnersut eqqoriarniarnera ajornaatsuinnaaneq ajorpoq.
- Tassa taanna nalunartua, ilaannikkut piniarneq qanoq akeqarpa? How much does it costimik oqaraangama ingammik takuneqarluartarput, Qupanuk Olsen oqarpoq.
Videolialli sorliit takuneqarnerunissaat eqqoriarnartarpoq. Taassuma videoliai ilami ilai nunarsuaq tamakkerlugu takuneqassangatitani 100.000-iinnarnik takuneqarsinnaasarput.
Q’s Greenlandip videoliai immaqa uagut ulluinnarsiutitut isigisagut inuppassuarnut nunarsuarmiittunut ulluinnarsiutaanngillat.
- Nunarsuarmioqatigut inuit qujamasussuaartarput kiisami kalaallit nunaat pillugu ilikkagaqaramik paasisaqaramik eqqortunik paasissutissanik tunineqarlutik. Inuppassuit kalaallit nunaat sermersuaannartut isigisaramikku nuannaartaqaat ilumut paasillugu nunarput qanoq ittuunersoq.
Naak 1 millioninik malinnaasoqalerneq iluatsitsisimaarnertut takorloorneqarsinnaagaluartoq Qupanuk Olsen tamaannga uniinnanngilaq.
Ukioq manna anguniakkani angoreeramiuk, tullia anguniarlugu aallartereerpaa.
- Platformini tamani millioninik malinnaasoqalernissara youtubemi millionit, facebookkimi millionit, instagrammimi millionit, Tiktokkimilu millionit tassa taanna anguniagara.
