Qupanuk Olsen 600.000-init ikinnerunngitsunik malinnaasulik: Anguniagara angulerpara
- Life is amazing!
Oqaatsit taakkupput Qupanuk Olsenip Qaqortumi inunngorlunilu peroriartortup nunarput pillugu videoliamini naggasiutigisartagai.
Videollu taakku siullersaat Q's Greenlandimi piginnittup YouTubekkut quppernermini siullermeerluni februaarip ulluisa 17-ianni 2020-mi ikkuppaa.
Maannalu nersornaatisissutigalugit.
- Nuannaarsuaarpunga pikkusoqaanga tulluusimaarsuaarlunga qiasunnguummitallannaasalluni aamma, taanna KNR-imut oqarpoq.
Qupanuk Olsen Youtubekkut quppernermini Q's Greenlandimi 169.000-t missaannik malinnaasoqarpoq.
Taassuma Q's Greenland suliffimmi saniatigut kajumissutsiminik ingerlataraa, inuillu attaveqatigiittarfiini Facebookimi, Instagramimi, TikTokimi Youtubemilu quppernermini maanna katillugit inunnik 600.000-nit ikinnerunngitsunik malinnaasoqarpoq.
Taassumalu taama malinnaasoqartiginini tulluusimaarutigeqaa.
- Nuanneqaaq tulluusimaarnaqaaq. Kiisami anguniagara angulerpara, neriukkaluarpunga ukioq manna naatinnagu millioninik malinnaasoqalersimassallunga, Qupanuk Olsen oqarpoq.
Silver Creator Awards tassaavoq Youtubekkut inuit videoliaminnik saqqummiisartut inunnik 100.000-nit ikinnerunngitsunik malinnaasoqaleraangata tunniunneqartartoq.
Qupanuk Olsenip inuit attaveqatigiittarfiini videonik ikkussisarnermigut nunatta nunarsuarmioqatitsinnit ilisimaneqarnerulernissaa siunertaraa, anguaniakkanilu angulerlugu misigivoq.
Taassuma videoliortutut inuuniuteqalernissi siunissami neriuutigalugu ilanngullugu oqaatigaa.
