Kalaaleq Herstedvesterimi parnaarussaq misiligummik iperagaaguni Kalaallit Nunaannut angerlarusunngilaq
Herstedvesterimi kalaaleq angut parnaarussaq Landsretip aalajangiineragut ukiut aqqanillit sinnerlugit parnaarussaareerluni misiligummik iperagaasussanngorpoq. Parnaarussaanini sivisummat, nunatsinnullu uterusunnginnami, Danmarkimiiginnarniarpoq.
60-ileereerluni ukiullu aqqanillit nunagisaq qimaqqareerlugu uteqqinnissaq ajornartoq, Herstedvesterimi parnaarussat ilaata misigisimavaa. Landsretimi eqqartuussaanera ullumi nalilerneqarmat, ukiut aqqanillit ingerlanerini qanigisai arlallit toqukkut qimagutereersimapput, nunatsinnullu attaveqarnera killeqalersimalluni. Taarsiullugu Danmarkimiinnermini attavigisaqalersimavoq, ingerlariaqqinnissamini ikorfartortissaminik, paasinarsiumaarporlu inuuneriligassani sungiukkuminartissaneraa; unnerluussisut ilimaginngilaat, ullumilu aalajangerlugu angut 60-nik ukiulik Herstedvesterimi parnaarussaaginnassasoq.
Aasianni eqqartuussiviup siorna novemberimi aalajangigaa, parnaarussaanerminit inuiaqatigiinnut akuuleqqinnissaanut ukiup affaata ingerlanerani sungiukkiartussagaa, Landsretip isumaqatigalugu aalajangiivoq, anereernermilu kingorna nakkutigineqassaaq. Inissarsiuuttariaqarpoq, ukiullu affaa siulleq tassunga atorneqassaaq, pingaaruteqarporlu aninermi kingorna pinerluuteqaqqinnginnissaa. Antabusitortinneqassaaq, ikiaroornartutussanngilaq, atoqatigiinnerullu tungaagut qiimmannaveersaatitortinneqassalluni, inuullu pissusiinik immikkut ilisimasalimmik attaveqaannassalluni. 60-nik ukiullip aalajangiineq tupaallaatigaa, isumaqarsimagami unnerluussisup piumasaqaataa Landsretip malissagaa, tassalu Herstedvesterimiiginnarnissaa. Angut misiligummik iperagaasussaq, tamanna pillugu ima oqarpoq:
- Aap, soorunami nuannaartorujussuuvunga, kisianni aamma aappaatigooqartippara, tassa makkua oqaaseqaatit sakkortuut atorneqartut, pingaartumik anstaltiminngaanniit, aamma unnerluussisuninngaanniit, tassa ilimagisimagaluarpara annerusumik unnerluussut piumasaa atortinneqassasoq, kisianni tassa massakkut qujanartumik aalajangiinera nuannaarutigeqaara, aamma sapinngisara tamaat piumasarineqartunut malinnaallunga ingerlaniarsarissaanga.
Parnaarussap ukiorpanni ikinngutaata Tine Bryldip qularutiginngilaa angutip neriorsuutini eqqortikkumaarai:
-Malittarisassanik unioqqutitsinikuunngilaq, qularinngilaralu iluatsikkumaartoq. Imminut isumagisinnaasungavoq, nalunngeqatiginnissusaalu ippinnaateqanngilaq. Aamma ilisimavaa kikkut attaveqarfigissallugit, ikorfartoqatigissallugillu, Trine Bryld oqarpoq.
Angutip sivisuumik mattusimaneqarnera parnaarussaajunnaarneranut eqqartuussisuusup Lars Gaaip tunngaviliisuunerarpaa. Eqqartuussineq video iluaqutigalugu Nuummiit Herlevimut attaveqarluni ingerlanneqarpoq.
