Ane Hansen: Borgmestereqartitsilernissamik isumaqatigiinniartariaqarpugut

Ane Hansen Qaasuitsut Kommuniata kujasinnerusortaani ajugaasungagaluarpoq.

Inuit Ataqatigiit taaguunneqarnerpaapput, Ane Hansenilu 350-init qinersiseqarluni borgmesterinngortussaarpasilluni.

Kisianni Inuit Ataqatigiit Siumullu kommunalbestyrelsimi arfineq-marlunnik tamarmik immikkut ilaasortaatitaqalissapput, Atassullu ataatsimik aalajangiisussaasumillu ilaasortaatitaqalissalluni.

Tassalu Ane Hansen borgmesterinngorumaguni Siumumik Atassummilluunniit isumaqatiginninniartussanngorpoq.

- Tassa taamatut inississinnaalluta unnukkulli takoreernikuuarput. Taamaattumik taanna aamma tunngavigalugu piareersaalluarnikuuvugut.

Ane Hansen oqaluttuarpoq, borgmesterinngortitsinissaq atatsimiititalianilu inissat pillugit isumaqatigiinniarnerit oqaloqatigiinnerillu ullup ingerlanerani aallartilluassasut.

IA kommunimi taaguunneqarnerpaavoq, borgmesterinngortitsinissamilu partiit allat tamanna ataqqissagaat, Ane Hansen neriuppoq.

- Taassuma tungaatigut soorunami isumalluarpugut. Innuttaasut qinersinerat naliginnaasumik ataqqineqartarmat.

Ane Hansenimik ikiuisinnaagaluartoq tassaavoq Demokratit kommunimi tassani sassartitatuaat, Simigaq Heilmann.

Taassumami kommunalbestyrelsimut qinigaasimagaluaruni Ane Hansenip borgmesterinngornissaa qulakkeersimassagaluarpaa.

Simigaq Heilmann KNR-imut oqarpoq, qinigaasimagaluaruni IA-p borgmesterinngortitsinissaa toqqaasimassagaluarlugu.

Kisianni maannakkutut itsillugu, Ane Hansen borgmesterinngorniassaguni isumaqatigiinniaqqaartariaqarpoq. Tamannalumi eqqumaffigaa.

- Sunaluunniit, sunaluunniit politikkimi pisinnaammat, suna tamaat piareersimaffigisarparput, Ane Hansen taama oqarpoq.

Siumumeersuni taaguunneqarnerpaasoq, Jess Svane, borgmesterissarsiorluni isumaqatigiinniarnerit pillugit suli oqaaseqarumanngilaq.