Qinersinermi qinerneqarnerpaat aajuku
Inuit Ataqatigiit Kommuneqarfik Sermersuumi borgmesteriutitaat, Asii Chemnitz Narup immikkut illuinnartumik angusaqarpoq. Taanna 2259-init qinerneqarpoq. Tassa nuna tamakkerlugu qinersisut 9 procentiisa qinerpaat.
Taamaattorli politikerit allat aamma qinerneqarluarnertik nuannaarutigisinnaavaat.
Atassutip siulittaasua
Atassutip siulittaasortaava Siverth K. Heilmann qinerneqarnerpaanut ilaavoq. Inuit 596-it Heilmann Qeqqata Kommunianut qinigassanngortittoq qinerpaat.
Qinerneqarnerpaat pingajuat aamma Atassummeersuuvoq. Aqqalu Clasen Jerimiassen Ilulissaneersoq marlunngornermi qinersinermi 530-init qinerneqarpoq.
Taakkuli marluk angusarissaaraluarlutik borgmesterinngornavianngillat.
Qinerneqarnerpaanili tulliuttup Malik Berthelsenip Siumumeersup 522-init qinerneqartup partiia kommunimi qinerneqarnerpaagami Qeqqata Kommuniani borgmesterinngorsinnaanini ilimagisinnaavaa.
Qinerneqarnerpaanik tulleriaarinitsinni kingulleq tassaavoq Siumumit naalakkersuisuusimasoq. Martha Lund Olsenip borgmesteritut atuuffik Asii Chemnitz Narupimiit aarsaarinnissutiginiaraluarpaa.
Taamaattoqanngilarli, Siumumiilli politikerip kommunalbestyrelsemut ilaalernini 482-iniillu qinerneqarnini nuannaarutigisinnaavaa.
