Qinersinermi ajugaasut aaku
![](/sites/default/files/styles/image_934x467/public/article_images/p4261078_2.jpg?itok=Hq7IJ2o7)
![](/sites/default/files/styles/image_934x467/public/article_images/mabr7241.jpg?itok=9wR4W-Qn)
![](/sites/default/files/styles/image_934x467/public/article_images/img_4608.jpg?itok=P_rvIRix)
![](/sites/default/files/styles/image_934x467/public/article_images/kiista-p-isaksen-212x300.jpg?itok=hOTJOLC2)
Asii Chemnitz Narup Inuit Ataqatigiinneersoq Kommuneqarfik Sermersuumi qinerneqarnerpaavoq, taanna 2000-it sinnerlugit qinerneqarpoq.
Kommunemilu borgmesteriiginnartussaarpasippoq.
- Soorunami inuttut nuannaarpunga. Uummammik pisumik Nuummi tunuliaqutsiisut qujaffigaakka. Nuummi ineriartortitsinissaq tunuliaqutserneqarpoq, Asii Chemnitz Narup KNR-imit ilanngutassiortumut oqarpoq.
Siorarsiorfik qineqqusaarnerup nalaan oqallisaangaatsiartoq innutaasunit tunuliaqutserneqartoq, Asii isumaqarpoq.
- Suliniummut tassungarpiaq piviusunngortitsinissamut tunuliaqutserneqarpugut, Asii Chemnitz Narup oqarpoq.
AAMMA ATUARUK Kommunimut qinersineq naammassivoq
Qaasuitsup kujataani IA siuttuusoq
Qaasuitsup Kujataani Inuit Ataqatigiinniit borgmesteritut atuuffik tiguneqartussaarpasippoq, tassanilu Ane Hansen 300-nit amerlanerusunit qinerneqarsimalluni siuttuuvoq.
- Qujanarujussuaq tatiginninnermik taama angitigisumik tunuliaqutseratsigut. Naatsorsuutigivarput borgmesterinngortitsisinnaalluta, Aasianni borgmesteriusimasoq, Ane Hansen oqarpoq.
Taanna kommunimi nutaami siammasissumik suleqateqarluni sulinissamut piareersimavoq.
Kommunemi nutaami qinersisunit Siumut 40.6-inik qinerneqarpoq. Atassut 7.7 procentimik qinerneqartoq Demokraatit 5 procentimik qinerneqarpoq.
Hermannip taartissaa qinerneqarpoq
Qeqqata kommuniani Malik Berthelsen Siumumeersoq 500-t sinnerlugit qinerneqartoq borgmesterinngortussaarpasippoq.
- Soorunami tupaallaatigivara taama amerlatigisunik qinerneqarama. Neriorsuutigissavara maniguullunga sulissagama, Malik Berthelsen, Inatsisartuni ilaasortaasimasoq, oqarpoq.
Taassuma qinersinerit tamakkerlugit kisinneqarnissaat utaqqeqqaarusuppaa, taamaattorli akisussaaffimmik tigusinissaminut piareersimanerarpoq.
- Borgmesterinngussaguma akisussaaffimmik tigusinissannut piareersimavunga, Malik Berthelsen oqarpoq.
Wæver taarserneqaqrpoq
Arnani borgmesterinngorsinnaasuni Kiista P. Isaksen Siumumeersoq pingajuuvoq. Taanna 450-inik qinerneqarluni parteeqatiminit Jørgen Wæver Johansenimit Simon Simonsenimiillu qinerneqarneruvoq, taakku 265-init 210-nillu qinerneqarput
Siumut avannaani aamma ajugaavoq
Palle Jerimiassen Qaasuitsup avannaani borgmesterinngornissaa ilimanaateqarpoq. Ullulli tulliuttut avannaani partiit isumaqatigiinniarnerisa inernerata Jerimiassen borgmesterinngussanersoq takutikkumaarpaat.
AAMMA ATUARUK IA marlunnik - Siumut pingasunik borgmesteriuteqalerput