Arnat pissaanermik tigusinissaminnut piareertut
Arnat kommunalpolitikkimut soqutiginninnerat annikitsoq oqaatigineqarnikuuvoq. Kommuninut qinersinissamut qinigassanngortittut 26 procentiinnai arnaasut qinersinnginnermi KNR-ip naatsorsuinerata takutinnikuuaa.
AAMMA ATUARUK Arnat sassartut ikinnerupput
Maannali qinersisartut qinersereerneranni politikerit arnartai nikittusut erserpoq. Tassami arnat pingasut borgmesterinngornissaat ilimanaateqarpoq.
Kujataani
Kiista P. Isaksenip Siumumeersup Kommune Kujalermi borgmesterinngornissaa ilimanarluinnarpoq. Taanna 450-init qinerneqarluni parteeqatiminit, Jørgen Wæver Johansenimit Simon Simonsenimiillu, 266-init aamma 216-init qinerneqartunit, qinerneqarneruvoq.
Avannaani
Qaasuitsup Kujallermi Aasianni borgmesteriusimasoq, Ane Hansen 350-init qinerneqarluni qinigaanerpaavoq, borgmesterinngornissaalu ilimanarluni.
Arnat qinigaanerni qulini initusut
Asii Chemnitz Narup Inuit Ataqatigiinneersoq Kommuneqarfik Sermersuumi borgmesteriuinnassaaq. Demokraatit qinersineq sioqqullugu Inuit Ataqatigiinniit borgmestereqartitsinissamik tikkuaanikuupput.
Nunatsinni qinerneqarnerpaat qulit qiviaraanni arnat qinerneqarnerit arfinilliusut takuneqarsinnaavoq. Asii Chemnitz Narup, Martha Lund Olsen aamma Nivi Olsen allallu qinerneqarluarsimallutik.
