Naalakkersuisut Asiami sinniisoqarfeqalernissamut siunnersuuteqartut
Naalakkersuisut Asiap kangisissuani sinniisoqarfeqarnialerput.
Asiap kangisissuani sinniisoqarfeqalernissamut siunnersuut inatsisartut upernaakkut ataatsimiinnissannut saqqummiunneqartussaq, naalakkersuisut marsip ulluisa qulinganni ataatsimiinnermi akuersissutigaat.
Sinniisoqarfiup Kinami inissisimanissaa siunnersuutigineqarpoq. Sermitsiaq.AG taama allaaserisaqarpoq.
Beijingimi sinniisoqarfeqalernissamut periarfissat misissorneqaleruttortut
Kinami sinniisoqarfeqalernissamut suliaq 2018-imi novembarimi aallartippoq, nunanut allanut tunngasunut naalakkersuisup Ane Lone Baggerip taamani siunnersuutigimmagu.
Kinap illoqarfiisa pingaarnersaanni Beijingimi sinniisoqarfimmik 2020-mi ammaanissamut periarfissat suunersut misissorneqaleruttortoq, naalakkersuisut nunanut allanut tunngasutigut naalakkersuinikkut ingerlatsineq pillugu siorna nassuiaat saqqummiummassuk oqaatigaat.
Sinniisoqarfiup Kalaallit Nunaata Asiami nunani allani niueqateqateqarfii aamma attaveqarfigissavai, Japan Korea Kujallerlu taakkununnga ilaallutik.
Kinami arlaleriarlutik nittarsaassinikut
Niueqateqarfiusut qanimut suleqatigineqarnisssaasa saniatigut Kalaallit Nunaanni aningaasaliiffiusinnaasut Asiap kangisissuani nittarsaanneqarnisssaat sinniisoqarfiup suliassaanut ilaassapput.
Naalakkersuisut Kalaallit Nunaanni aningaasaliiffissatut periarfissat Kinami arlaleriarlutik nittarsaannikuuaat.
Vittus Qujaukitsoq 2016-imi Kinamiippoq Kalaallit Nunaannit nioqqutissat tassani nittarsaakkiartorlugit. Kim Kielsen Kinami naalakkersuisunit qaaqqusaalluni taava 2017-imi aamma Kinaliarpoq, allanik ilaqarluni angalalluni.
Aqqalu Jerimiassen Kalaallit Nunaannit imermik nioqqutissamik nittarsaassiartorluni 2018-imi aamma Kinamiippoq.
