Assi: Max Braun

Kuannersuit: Kinamut nioqquteqarsinnaaneq danskit partiivisa ernumanartoqartinngikkaat

Saffiugassat qaqutigoortut Kuannersuarneersut malittarisassat tamaasa naammassineqarpata aatsaat Kinamut nioqqutigineqarsinnaanissaat Socialdemokraatit Dansk Folkepartiillu tatigaat.

Greenland Minerals and Energy Ltd.-p (GME) aatsitassanik Kuannersuarneersunik, urani thoriumilu ilanngullugit, avammut nioqquteqarnissamik Kinamiut ingerlatseqatigiiffiannut isumaqatigiissuteqarnera danskit politikeriisa arlallit ernumanartoqartinngilaat.

AAMMA ATUARUK Kina saffiugassanik qaqutigoortunik Kuannersuarneersunik pisiortorusuttoq

Dansk Folkepartiillu siulittaasuata tulliata Søren Espersenip maluginiarpaa aatsitassanik Kuannersuarneersunik Kinamut nioqquteqartoqassappat, taava Danmark Kinalu avammut nioqquteqarnissaq pillugu isumaqatigiissusiortariaqartut. Avammut nioqquteqarnissaq taamaalilluni Danmarkimit aalajangiiffigineqartussaassaaq.

- Illersornissamut qullersaqarfiup Isertortumik paasiniaasui akuutinneqarnermikkut qanoq ingerlatsisoqarnissaanik ilisimasaqarmata, danskillu naalakkersuisuisa inaarutaasumik – tassunga killittoqassappat – akuersissuteqartussaammata tatigilluinnarpara, Espersen KNR-imut oqarpoq.


Espersen: Kinap Kalaallit Nunaannut soqutiginninnera ernumanartoqarpoq

GME Kuannersuarni piiaavimmik ammaanissaminut Naalakkersuisunit suli akuerineqanngilaq. Taamaammat aatsitassanut suliffeqarnermullu naalakkersuisup Erik Jensenip (S) GME-p Hua Shengillu avammut nioqquteqarnissamik isumaqatigiissutaat isummerfigerusunngilaa.

Kinallu Nunatsinnut soqutiginninnera Dansk Folkepartiip nalinginnaasumik qularnartoqartippaa. Kinap nunatsinni mittarfiliortiternernut Kangilinnguanilu sakkutooqarfimmut aningaasalersuinissamik soqutiginninneratigut tamanna paasinarsivoq.

AAMMA ATUARUK - Vi har endnu ikke modtaget ansøgning

- Kinamut Kalaallit Nunaannullu tunngasunik arlaatigut pisoqartillugu susoqarnera nakkutigeqqissaarneqartariaqarpoq. Kinami matumani ataasinnarmik soqutigisaqarpoq, tassalu Kalaallit Nunaannut qanillattornissaq, mannalu aqqutissat ilagivaat, Søren Espersen oqarpoq.

GME-lli aatsitassanik nioqquteqarnissaminut atatillugu Kinamut isiginera Espersenip aamma paasilluarsinnaavaa. Saffiugassammi qaqutigoortut suliareqqinneqartarnerinut Kina nunarsuarmi siuttuuvoq.

- Matumanilu Kinami immikkut ilisimasalinnit isumaginnittuuppata immaqa arlaatigut pitsaanerussaaq, Espersen oqarpoq.

Hækkerup: Nalilersuinerit tatigai

Søren Espersenilli erseqqissaatigaa Hua Shengimut isumaqatigiissut USA-p ernumanartoqartissagaluarpagu, taava danskit naalakkersuisuisa aatsitassanik Kuannersuarneersunik avammut nioqquteqarnissamik Kinamut isumaqatigiissuteqarnissaq itigartitsissutigisariaqaraat.

AAMMA ATUARUK Kinamiut Kuannersuarnit pisiortornissaat IA-p ernumanartoqartikkaa

Aamma Socialdemokraatit nunanut allanut tunngasunut oqaaseqartartuata Nick Hækkerupip avammut nioqquteqarnissamik isumaqatigiissutip piviusunngortinneqannginnerani Hua Shengip ilaatigut uranimik suliareqqiinermut Danmarkimi nunanilu tamalaani malittarisassanik naammassinninnissaa tatiginerarpaa.

- Aatsitassat pillugit suliat ilisimasalinnit nalilersuiffigineqarnerat suliallu Danmarkimi nalilersuiffigineqarluni ingerlanneqarnera uagut (Socialdemokraatit, aaqq.) tunngavigissavagut, KNR-imut taama oqarpoq.

AAMMA ATUARUK Kinamut niuerneq pillugu isumaqatigiissuteqarnermi malittarisassat malinneqassapput

 

Isummersuutit

Atuarneqarnerit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat