Kina saffiugassanik qaqutigoortunik Kuannersuarneersunik pisiortorusuttoq

Greenland Minerals (GME), Narsap eqqaani Kuannersuarni piiaaviliornissamik suliniuteqartoq taama nalunaaruteqarpoq.

GME-mi piginneqataassutit amerlanersaannik piginnittoq, Shenghe Resources Holding Coorporation Ltd., ingerlatseqatigiiffimmik nutaamik pilersitsivoq, tassalu China Nuclear Hua Sheng Mining Ltd. - naalisarlugu Hua Sheng.

Ingerlatseqatigiiffimmik piginnittup aappaa tassaavoq Kinap naalagaaffianit pigineqartoq China National Nuclear Corporation, taannalu saffiugassanik qaqutigoortunik pisiortornissamut Kinamilu suliaqarnissamut Kinap naalagaaffianit piginnaatinneqarpoq.

AAMMA ATUARUK Narsami innuttaasunut ataatsimiisitsinermi uran eqqartorneqarpoq

Nutaamillu suleqatigiittoqalerneratigut Hua Shengip saffiugassanik qaqutigoortunik Kuannersuarneersunik pingaarnertut pisiortortuunissaa ilimagineqarpoq. GME taama ilisimatitsivoq.

AAMMA ATUARUK Danmark nunarpullu Kinamut erseqqissunik tunaartarisassiortariaqarput

- Shenghep Hua Shengimik piginneqataaneratigut saffiugassanik qaqutigoortunik uranitalinnik thoriumitalinnillu Kinami suliareqqitassanngorlugit pisiortornissaa aqqutissiuunneqartoq, GME tusagassiorfinnut nalunaarummini allappoq.

GME-miillu ilanngullugu oqaatigineqarpoq saffiugassanik qaqutigoortunik, soorlu uranimik thoriumimillu akulinnik, Kuannersuarneersunik avammut nioqquteqarneq nunani tamalaani sillimaniarnikkut maleruagassat najoqqutaralugit pissasoq.

AAMMA ATUARUK Tailingit Tasermi toqqortarineqassasut

Nutaamik isumaqatigiissuteqartoqarneratigut saffiugassat qaqutigoortut Kuannersuarneersut suliarineqanngitsut Kinamit tigoorarneqarnissat ilimanartupilussuuvoq, taamaaliornikkullu akoorutissat atorlugit suliareqqinneqarneri Kinami pisussaassalluni. Komnune Kujallermi ujarassiuutut atorfilik, Ole Christiansen, Sermitsiamit apersorneqarluni taama naliliivoq.

Kina saffiugassanik qaqutigoortunik nunarsuarmi pisiortortut annersaraat, taakkulu oqarasuaatinik angallattakkanik, isiginnaarutinik qarasaasiaaqqanillu tunisassiornermut atoneqarnerusarput. Aatsitassat immikkoortiternissaanut teknologiip tungaatigut Kina aamma siuttuuvoq.

GME-p Shenghe Resources, GME-mik 12,5 procentinik piginneqataasoq, 2018-imi aggustip qaammataani pituttuinngitsumik suleqatigilerpaa.

AAMMA ATUARUK Ajornartorsiutaasut VVM-imi qarsupinneqarput