Avataq: Ajornartorsiutaasut VVM-imi qarsupinneqarput
Oktoberip 17-iat nal. 15.30: allaaserisami erseqissarparput, Avatap isummerfigisaaa tassaammat VVM-imut missingiut.
Kuannersuarni piiaaviliornissamik pilersaarummut VVM-imik nalunaarusiassatut missingiut amingaateqarpoq paasissutissanillu uninngatitsisoqarsimavoq. Avatameersoq Mikkel Myrup taama isumaqarpoq.
Taanna piiaaviliornissanut tunngasuni avatangiisinut sunniutaasinnaasut pillugit nalunaarusianik nalilersuinermik ukiorpassuarni misilittagaqarpoq.
Mikkel Myrup naapertorlugu VVM-imik nalunaarusiassatut missingiut amingaateqartoq paasissutissanillu uninngatitsisoqarsimavoq tunniunneqartoq 2015-imi tunniunneqartumut naleqqiullugu annertunerusumik allannguuteqanngilaq. Piiavissap ilusiligaanerata nalunaarusiami siullermiittup assigigaa erseqqissaatigaa, tamannalu Kuannersuarni piiaaliviornissaq 80-ikkunni oqallisigineqarmat aamma sammineqarpoq.
- Ajornartorsiutaasut soorunami allanngunngillat, isumarpungalu nalunaarusiami matumani qarsupittumik sammineqarput.
AAMMA ATUARUK Kuannersuit suliffippassuarnik pilersitsiffiunissaat Berthelsenip neriuutigaa
Nalunaarusiaq naammanngitsoq
Avatangiisinik illersuiniaqatigiiffimmeersoq, Kuannersuarni suliniut pillugu pitsaasunik oqaasissaqanngitsoq, taama oqarpoq. Arlalinnillu immikkut eqqumaffigisassaqartoq oqaatigaa.
- Tailinginik uninngatitsiviusumi qinngornernik ulorianartunik akullit soorunami pineqarput, aamma tailingit uninngatinneqarnerinut periaaseq toqqarneqartoq, kiisalu aamma pujoralammut tunngatillugu ajornartorsiutaasoq nalunaarusiami matumani pimoorunneqarpallaanngitsoq.
Saffiugassap piiarneqartup ilarujussua Natriumfluorimik annertuumik akoqarpoq, taannaavorlu pujoralak piiavimmeersoq aqqutigalugu siaruarterneqaratarsinnaasoq.
Flourit Natriumfluoriditut ittut kolestorolitigut allannguutinut, naartut ajoqusernerinut, tingukkut nappaateqalernermut, anisuup pitsaassusiata ajorseriarneranut, hormonitigut ajoquteqalernermut saarngitigullu innarluuteqalernermut pissutaasarsorineqarput.
- Pujoralaap piiaviup avatangiisianut, assersuutigalugulu Narsap illoqarfianut imeqarfianullu siaruaatinnginnissaa ajornartorsiutaassaaq.
AAMMA ATUARUK GME håber på at starte byggeriet ved Kuannersuit i 2017
Periaaseq silap pissusianut naleqqutinngitsoq
Pujoralak anorimit siaruarteqqunagu imermik tissaluttaatinik isugutserneqartarnissaanik aaqqiissutissaq VVM-imik nalunaarusiamut missingiummi ilaatigut allaaserineqarpoq. Mikkel Myrupilli tamanna iluaqutaavallaassasorinngilaa. Taamatummi periaaseqarnerup Narsap silaanut assingusumi, ukiukkut issittupilussuusinnaasumi, misilittarneqarsimannginnera erseqqissaatigaa.
- Teoreersorluni nalunaarusiami takorluukkat qarsupittuupput piviusumilu iluamik atorneqarsinnaarpasinnatik, Mikkel Myrup oqarpoq.
GME isorineqartut pillugit oqaaseqartinniaraluaratsigu iluatsinngilarput.
AAMMA ATUARUK Avatangiisit pillugit aarleqquteqarneq VVM-imik nalunaarusiami akerlilerneqartoq
