Assi: KNR

Naalakkersuisunut ilaasortat sisamat Kinamut pilerisaariartulersut

Kim Kielsen Kinami naalakkersuisunit pisortatigoortumik qaaqquneqarluni sapaatit akunnerata tulliani Kinaliassaaq, arlalinnillu angalaqateqarniarpoq.

Inatsisartut sapaatit akunnerat 44 ataatsimiiffigissanngilaat, imaanngilarli sulinngiffeqartoqassasoq, ingammik  naalakkersuisunut ilaasortat Hans Enoksen, Karl Kristian Kruse Múte Borup Egedelu eqqarsaatigissagaanni. Taakkumi ittortik Kim Kielsen Kinamut pilerisaariartoqatigissavaat Københavnimiillu arfininngorpat aallassapput. 

Naalakkersuisut siulittaasuat, Kim Kielsen, Kinami naalakkersuisunit Kinap Københavnimi aallartitaqarfiatigoortumik tikeraarsarneqarsimasoq, naalakkersuisut siulittaasuata naalakkersuisoqarfia tusagassiortunut sisamanngormat ualikkut ilisimatitsinermi taama paasissutissiivoq.

Angalaqatigiit katillutik 25-ussapput, tassaallutik politikerit, atorfilittat nunatsinnilu inuussutissarsiutinik ingerlataqartut aallartitaat.

Attavissarsiorlutillu isumaqatigiissuteqarniassapput. Angalaqatigiinnut aamma ilaavoq Kalaallit Airports, Kinami aningaaserivinnut sanaartornermillu suliaqartunut, mittarfiliassat aningaasalersorneqarnissaannut sanaartornissaannullu neqeroortitsisoqalerpat suliassanut neqeroorusussinnaasutut takorloorneqarsinnaasunut imminut nittarsaatissaaq.

AAMMA ATUARUK Royal Greenlandip nipisat ilivitsuutillugit Ruslandimut Kinamullu nioqqutiginiarai

Tamatuma saniatigut Kinaliarnermi pingaarnertut sammineqartussat tassaassapput Royal Greenland, Polar Seafood politikerillu akisussaasut. Aalisakkammi pilersaarutini pisortatigoortuni annertuumik sammineqartussaapput.

Pingasunngorpat - angalanerup ulluisa pingajuanni - aalisarnermut naalakkersuisup Karl Kristian Krusep inuussutissarsiornermullu naalakkersuisup Hans Enoksenip Kim Kielsen illoqarfimmut umiarsualiveqarfimmut Qingdaoliaqatigissavaat. Tassanilu ilasseqatigiinneq Royal Greenland Polar Seafoodilu suleqatigalugit aaqqissuunneqartoq peqataaffigissallugu. Sisamanngorpallu niuerfimmut alakkarterisoqannginnerani aalisarneq pillugu nittarsaassisoqassaaq. 

AAMMA ATUARUK USA-p Kinallu Nunatsinneeqatigiinnissaat Løkkep annilaangagaa

Tallimanngorneq illoqarfimmut umiarsualiveqarfimmut Qingdaoimut tikeraarnerup ulluisa kingullersarissavaat. Naalakkersuisunut ilaasortat pingasut suliffeqarfik China Starfish, Polar Seafoodip Royal Greenlandillu Kinami suleqatigisaat pulaassavaat. 

Aatsitassanullu naalakkersuisup aatsitassarsiornerup iluani suliaqartut Beijingimi ataatsimeeqatigissavai. Ilaatigullu Danmarkip Kinami illoqarfiit pingaarnersaanni aallartitaqarfiani aatsitassat pillugit isumasioqatigiissitsisoqassaaq. 

Angalaqatigiit tallimanngorpat Beijingimi naapeqqissapput arfininngorpallu Københavnimut utissallutik. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat