Tusagassiorfik: USA-p Kinallu Nunatsinneeqatigiinnissaat Løkkep annilaangagaa
Suliamik ilisimannittut nunat tamalaat akornanni nutaarsiassaqartitsivimmut Reutersimut taama uppernarsaapput.
Illersornissaqarfiup ukiuni arlalinni Kangilinnguit tuniniaraluariarlugit decembari qaammataagaa nalunaarpoq Kangilinnguit ataqatigiissaarinermi tapertarut ammaqqinniarlugu.
AAMMA ATUARUK Kangilinnguit pisariaqartipparput
Ammaqqinnissaannulli ersissutaasoq tassaasimavoq kinamiut suliffeqarfiutaata General Nice Groupip Kangilinnguit pisiarissappassuk Kinap Kalaallit Nunaanniinnermini sunniuteqalersinnaanera. Suliffeqarfik taanna siorna aasakkut danskit oqartussaasuinut saaffiginnippoq Kangilinnguani aningaasaliinissaq soqutigalugu.
Danmarkip iligisaani qaninnerpaap USAp aamma Kalaallit Nunaanniinnerata kinguneranik sillimaniarnermi politikki eqqarsaatigalugu nalorninartorsiortitsilersinnaammat Løkke taama aalajangersimasoq tusarfik oqarpoq.
AAMMA ATUARUK Kinamiut suliffeqarfiutaata Kangilinnguaniinnissaa ernumanartortaqartoq
- Kialuunniit takusinnaasariaqarpaa pissaanilissuit marluk Danmarkip Kalaallit Nunaanniitissinnaanngikkai. Aamma isumaqarpunga USAp tamanna nuannarinavianngikkaa.
Avatangiisinut naalakkersuisup Suka K. Frederiksenip Namminersorlutik Oqartussat kinamiut Kangilinnguanik soqutiginninnerannik ilisimatinneqarsimanngitsut oqaatigeqqaaraluarpaa.
Kingusinnerusukkulli nassuerutigaa ilisimatinneqarsimasut. Aatsaallu nassuerluni Namminersorlutik Oqartussanut Illersornissaqarfiup paasissutissaatai KNR-ip qulaarmagit.
Kangilinnguit ammaqqinneqarnissaat pillugu Løkkep siunnersuutaa Foketingimi amerlanerussuteqartunit aasaq taperserneqarpoq. Taama aalajangernermi kalaallit politikerii akuutinneqanngillat.
AAMMA ATUARUK Kangilinnguanik ammaaqqinnissaq Namminersorlutik Oqartussanit ilisimaneqareersoq
AAMMA ATUARUK Kalaallinik isumaqatiginninniarnernut qaaqqusinnginneq ileqqupalaajuvoq
