Aaja Chemnitz: Kalaallinik isumaqatiginninniarnernut qaaqqusinnginneq ileqqupalaajuvoq
Danskit tusagassiuutaat Defencewatch naapertorlugu kinamiut ingerlatseqatigiiffiutaata Kangilinnguinut aningaasaliissaa pinngitsoortinniarlugu ministeriuneq partiinilu siulittaasut illersornissamut isumaqatigiissuteqartut aasaq isumaqatigiissuteqarput, Kangilinnguillu Illersornissamut qullersaqarfimmit atorneqaqqittussanngorluni.
Foltetingimulli ilaasortat Nunatsinneersut kinamiut soqutiginninnerannut ilisimatinneqarsimanngitsut, Aaja Chemnitz Larsen oqarpoq.
- Paasissutissat uku pissarsiarisinnaasimanngilakka. Illersornissamut ministeri ataatsimeeqatigisareerpara, paasissutissalli uku uannut saqqummiutinngilai. Suliallu uuma ingerlanera qanoq ugguarnartiginersoq, Nunarpullu pineqartillugu kalaallinik isumaqatiginninniarnernut qaaqqusinnginneq pillugu ileqqupalaaqartoqarneranik tamanna takutitsisoq isumaqarpunga, Aaja Chemnitz Larsen oqarpoq.
AAMMA ATUARUK Kangilinnguit kinamiut pisiaringajakkaat
Nunanut allanut naalakersuisup Vittus Qujaukitsup Danmarki Nunatsinnit anneruniarnerarlugu sapaatip akunnerata matumani ingerlanerani isornartorsiorpaa.
Kangilinnguillu pillugit suliap isornartorsiut uppernarsaraa, Aaja Chemnitz Larsen isumaqarpoq, naak Vittus Qujauktsup isornartorsiuinermini oqaatsit atugai assuarigaguarlugit.
- Pituffimmut Camp Centurymullu suliat Nunattalu soqutigisaanut, soorlu assersuutigalugu aalisarnermut isumaqatigiinniaqataanissaq eqqarsaatigalugit taava aaqqiissutissarsiornissaq pillugu apeqqummut aappimik oqarusuppunga. Christiansborgimili misilittagakka naapertorlugit ataqqineqarusukkaanni isumaqatiginninniaqataarusukkaannilu tunngavilersorluakkamik paasissutissallu piviusut aallaavigalugit isornartorsiuisoqartarnissaa pisariaqarpoq, Aaja Chemnitz Larsen oqarpoq.
Folketingimi attaviitsutut ilaasortaq Aleqa Hammond suliaq pillugu oqaaseqarumanngilaq.
Illersornissamut ministereqarfik ilisimatitsivoq suliaq oqaaseqarfiginianngikkitsik. Venstrep illersornissamut oqaaseqartartua Peter Juel Jensen kinamiut Kangilinnguit pillugu soqutiginnissinnaasimanerat ilisimasaqarfiginagu KNR-imut oqarpoq.
KNR-ip folketingimi illersornissamut isumaqatigiissummut tunngasunik suliallit attavigisai kinamiut soqutiginnissinnaasimanerat uppernarsarumanagulu ilumuunnginnerarumanngilaat.
