Kangilinnguanik ammaaqqinnissaq Namminersorlutik Oqartussanit ilisimaneqareersoq
Illersornissamut ministereqarfiup Kangilinnguani sakkutooqarfiusimasup ammaqqinnissaanik pilersaaruteqarnera KNR-imi novembarip 23-ani oqaluttuaraarput.
Nutaarsiassarlu taanna Namminiilivinnermut, Pinngortitamut, Avatangiisinut Nunalerinermullu Naalakkersuisoqarfimmi tupaallaatigineqarpoq. Naalakkersuisunngorlaarlu, Suka K. Frederiksen, ullut marluk qaangiummata tusagassiorfinnut nalunaaruteqarluni ima allappoq:
- Allarpassuit assigalugit ulloq 23. november 2016 KNR-imi atuarpara Illersornissamut ministereqarfiup oqarnera malillugu maannakkut Kangilinnguit ammaqqinnissaa isumaliutersuutigineqartoq. Taamatut oqariartuuteqarneq tupaallaatigaara, tamatumalu kingorna atorfilittakka Illersornissamut ministereqarfimmut saaffiginneqquakka avammut oqariartuuteqarneq sumut tunngassuteqarnersoq itisilertinniarlugu.
Aamma atuaruk Kangilinnguit ammaqqinnissaa illersornissaqarfiup isumaliutigigaa
Naalakkersuisoqarfik juunimi ilisimatinneqarpoq
Naalakkersuisoqarfilli - taamani Pinngortitamut, Avatangiisinut Inatsisinillu atuutitsinermut naalakkersuisoqarfiusoq - Kangilinnguani saakutooqarfiusimasup Illersornissamut qullersaqarfimmit atoqqinneqalersinnaaneranik aasarli ilisimatinneqarpoq.
Illersornissamut ministereqarfiup allagaani juunip 30-ani ullulerneqarsimasumi KNR-ip pissarsiarisimasaani tamanna atuarneqarsinnaavoq.
Tassani allassimavoq ministereqarfik "Kangilinnguani sakkutooqarfiusimasup siunissami atorneqarnissaa pillugu isumaliuteqartoq", aamma: "Kangilinnguaniinnissamut periarfissat isumaliutigaagut”.
Ilisimatitsissutigineqarsimanera Sukap nassuerutigaa
Kangilinnguani sakkutooqarfiusimasup ammaqqinneqarnissaa pillugu KNR-ip aallaaserinninnera qaammatinik tallimangajannik sioqqullugu naalakkersuisoqarfiup ilisimatinneqarsimanera Suka K. Frederiksenip KNR-imut mailikkut allagaqarluni nassuerutigaa.
Kangilinnguanili sakkutooqarfiusimasoq Illersornissamut qullersaqarfimmit sumut qanorlu annertutigisumik atorneqassanersoq Namminersorlutik Oqartussanut taamani ullumikkullu naammaginartumik ilisimatitsissutigineqarsimanngitsoq erseqqissaatigaa.
Aamma atuaruk Illersornissamut ministereqarfik Kangilinnguit pisariaqartipparput
- Kisiannili suli Sakkutooqarfiup Kangilinnguit pillugit pilersaarutaannik naammaginartumik paasitinneqarsimanata isumaqarpugut. Qaqugu ammaaqqinnissartik naatsorsuutigaat? Sulisut qanoq amerlatigisut tassaniissappat? Atortut, ikummatissat il.il. qanoq annertutigisut atorneqassappat? Suka K. Frederiksen taama allappoq.
Aamma sakkutooqarfiusimasumi avatangiisinik saliinissamik isumaqatigiissutip Namminersorlutik Oqartussat Illersornissamullu ministereqarfiup akornanni isumaqatigiinniutigineqarnera suli naammassineqarsimanngitsoq erseqqissaatigaa.
Kangilinnguani sakkutooqarfiusimasup atorneqarnissaa itisiliiffigeqqullugu, avatangiisinik saliinissaq oqaaseqarfigeqqullugu kiisalu Kangilinnguit kinamiunit soqutigineqarsimanerannut tunngasoq oqaaseqarfigeqqullugu Namminersorlutik Oqartussani atorfilittat Illersornissamut ministereqarfimmut saaffiginnissuteqarsimasut, Suka K. Frederiksenip KNR-imut ilisimatitsissutigaa.
Aamma atuaruk Tusagassiuut: Kangilinnguit kinamiut pisiaringajakkaat
