Royal Greenlandip nipisat ilivitsuutillugit Ruslandimut Kinamullu nioqqutiginiarai
Royal Greenland siornatigut 2011-mit 2013-imut nipisat ilivitsuutillugit misileraalluni aamma tigooqqaavoq.
- Niuerneq eqqarsaatigalugu taamanikkut nipisanik ilivitsunik tunisineq imminut akilersinnaanngilaq, maannali nipisat ilivitsut aningaasarsiutaasinnaanerat neriuutigalutigu misileeqqippugut, Royal Greenlandimi tunisassiornermi ingerlatsisoq Sten Sørensen taama oqarpoq:
- Isumalluutaasinnaasut tamaasa atorluarusukkatsigit ukioq mannalu nipisat ilivitsut Ruslandimut Kinamullu tunisinnaaneq periarfissaammat aningaasarsiutigisinnaanerlutigik misileeqqippugut, Royal Greenlandip nittartagaanut taama oqarpoq.
Narsami, Paamiuni, Qeqertarsuatsiaani, Nuummi, Maniitsumi Kangaatsiamilu Royal Greenlandip tunisassiorfii ukioq manna nipisanik ilivitsunik tigooqqaallutik misiliipput.
Ilaatigullu Narsami Royal Greenlandip tunisassiorfianut katillugit nipisat ilivitsut tonsit sisamat suaallu 20 tonsit missingi tunineqareerput.
- Aalisartut nipisat suaannik nipisanillu ilivitsunik tunisisartut periarfissaq iluarisimaarpaat, Narsami Royal Greenlandip tunisassiorfiani ingerlatsisoq Niels Sakariassen oqarpoq.
