Aviâja Egede Lynge: Meeqqat Illersuisuattut ingerlaqqissaaq

Aviâja Egede Lyngep Meeqqat Illersuisuattut 2021-p tungaanut toqqaqqinneqassasoq Naalakkersuisut aalajangerpaat.

Allattoq Ivik Kristiansen

januaarip 13-at 2018 11:40

Killilimmik atorfeqartinneqarnera pisortatigoortumik junip aallaqqaataani 2018-imi naasussaammat taama aalajangerput.

Meeqqat Illersuisuatalu maannamut suliai isumaginninnermut, ilaqutariinnermut, naligiissitaanermut inatsisinillu atuutsitsinermut naalakkersuisumit nersualaarneqarput.

- Aviâja Egede Lyngep toqqarneqarneratigut meeqqat illersuisuattut atorfiup ingerlanneqarnerata allannguuteqanngitsumik ingerlaannarnissaa qulakkeerneqarmat nuannaarutigaara. Meeqqat pisinnaaffiisa qulakkeerneqarnissaannik suliaqarneq ukiuni kingullerni annertuumik anguaqarfiusimavoq, taamaammat meeqqat illersuisuata meeqqat illersuisoqarfianik ineriartortitseqqinnissaa suliallu pingaaruteqaqisup ingerlaqqinnissaa malinnaavigissallugu qilanaaraara, Sara Olsvig oqarpoq.

AAMMA ATUARUK Meeqqat sakkortuumik pissusilersortarnerat sapilernermik aallaaveqarpoq

Aviâja Egede Lyngellu toqqarneqaqqinnini tulluusimaarutigaa.

- Meeqqat sinnerlugit oqaaseqartartuuneq ingerlateqqissagakku ataqqinaatitut tiguara. Meeqqat Illersuisuattut piffissami siullermi sulisimaninni ilisimalersimasama misilittagarilersimasamalu atorluarnissaannut qilanaarpunga, Meeqqat Illersuisuattut toqqarneqaqqittoq oqarpoq.

Meeqqat Illersuisuattut killilimmik atorfeqarneq sivisunerpaamik ukiunik arfinilinnik sivisussuseqarsinnaavoq. Taamaattumik Aviâja Egede Lyngep Meeqqat Illersuisuattut sulinerata piffissaliussaanut ukiut pingasut kingulliit maanna aallartissapput.

AAMMA ATUARUK Meeqqat Illersuisussaat toqqarneqartoq

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.