Meeqqat Illersuisussaat toqqarneqartoq
Meeqqat Illersuisuat meeqqat inuusuttuaqqallu pisinnaatitaaffii soqutigisaallu aallaavigalugit sulisussaavoq. Meeqqat aqqutit suut atorlugit naammagittaalliuuteqarsinnaanersut tamatigullu isummaminnik tusaaniarneqartarnissaat qulakkeerniartartussaassavaa.
Meeqqat Illersuisuata pisinnaatitaaffigaa meeqqat atugarissaarnissaat inuuniarnikkullu atugarisaat pillugit nammineq naliliinini toqqammavigalugu imaluunniit allanit saaffigineqarsimanini toqqammavigalugu killilersorneqarani sukkulluunniit oqaaseqaateqarsinnaalluni. Meeqqat Illersuisuata aamma suliassaraa meeqqat sinnerlugit oqaaseqartartuuneq pisinnaatitaaffiilu pillugit illersuisuuneq.
Aviâja Egede Lynge aamma Meeqqat pillugit Siunnersuisooqatigiinnut siulittaasuuvoq politikkikkullu naqisimaneqarani sullissivimmi MIO-mi pisortaalluni.
Meeqqat tamaasa inissaqartittussaavagut
- Tatigineqarlunga Meeqqat Illersuisuattut toqqarneqarnera nuannaarutigeqaara. Uannut pingaaruteqartuuvoq meeqqat isiginiarneqarlutillu tusaaniarneqartarnissaat. Meeraq kinaluunniit inuttut kinaassutsini aallaavigalugu pisinnaatitaaffeqarpoq - aammalu meeqqat tamaasa inissaqartittussaavagut, apeqqutaatinnagu kikkuunersut qanorlu ittuunersut, Aviâja Egede Lynge, ukiuni arlalinni ilinniartitaanerup iluani suliaqarsimasoq aammalu nunap inuiisa pisinnaatitaaffii pillugit suliaqarsimasoq taama oqarpoq.
Aviâja Egede Lyngep taarserpaa Aaja Chemnitz Larsen, Nunatsinni Meeqqat illersuisuisa siullersaat, 2012-imit Inatsisartunut ukiormanna qinigaanissami tungaanut meeqqat illersuisuattut atorfeqartoq.