Assi: MIO

MIO: Meeqqat sakkortuumik pissusilersortarnerat sapilernermik aallaaveqarpoq

Ilinniartitsisut Kattuffiata, IMAK-ip atuarfeqarfinni meeqqat sakkortuumik qisuariartarnerannut tunngatillugu ilinniartitsisut imminnut illersorsinnaanissamut pikkorissarneqarnissaat ujartorpaa.

IMAK-ip siulittaasua, Birthe Møller Therkelsen, naapertorlugu meeqqat ukiuni kingullerni sakkortusaarnerusalersimapput.

Tamanna meeqqat inersimasullu soriarsinnaannginnerannik takussutissaasoq, Meeqqat Illersuisuat, Aviâja Egede Lynge, isumaqarpoq.

- Kommunit tamaasa aqqutigalugit paasereerparput ajornartorsiut annertusigaluttuinnartoq. Meeqqallu oqaloqatigisarneranni nalunngilarput, meeqqat ajornartorsiutinik annertuunik nammataqartut, soorlu paaqqutarineqarnermik qanilaassutsimillu amigaateqartut, Aviâja Egede Lynge tusagassiuutinut ilaatigut allappoq.

Meeqqap pissusilersornera takutitsisuusartoq Aviâja Egede Lynge isumaqarpoq.

Meeqqat Illersuisuata ernumanartippaa, nuna tamakkerlugu ajornartorsiutip qanoq annertutiginera tamakkiisumik paasiniarneqarnikuunngimmat, naak tamanna arlaleriarluni siornatigut uparuarneqartaraluartoq.

Taamaammat qanoq ajornartorsiutaatiginersoq paasineqarniassammat, ajornartorsiutip misissorneqarnissaa uppernarsarneqarnissaalu kaammattuutigaa.

- Meeraq tarnikkut ikiorneqarnissaminut pisinnaatitaaffeqarpoq. Pisinnaatitaaffillu taanna aallaaveqarpoq, Naalagaaffiit Peqatigiit meeqqat pisinnaatitaaffii pillugit isumaqatigiissutaanni allagaqaammi 39-mi, taassumalu eqquutsinneqarnissaa Kalaallit Nunaata pisussaaffigaa. Meeqqat pissusilersuutaat ikioqqunermik oqariartuutaapput. Uagullu ikiornissaannut akisussaassyseqarpugut, Meeqqat Illersuisuat naggasiivoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat