Nappaatipiluit Danmarkimi tuniluuttorujussuupput... aamma nunatsinni

Kinguaassiutitigut nappaatit soorlu klamydia, syfilis gonorrélu Danmarkimi tuniluunnerulersimapput. Pingaartumik inuusuttut illoqarfinni annerni najugallit tunillanneqartarput. Nutaarsiassaqartitsivik Berlingske taama allaaserisaqarpoq.
Assi © : Tamara Álvarez/Flickr Creative Commons
Allattoq Mads Lynge
maajip 17-at 2018 08:36

Kinguaassiutitigut nappaatit ukiuni kingullerni amerliartuinnavissimapput, amerliartornerallu Danmarkimi nakorsat ernummatigaat.

Nappaatipiluit amerliartornerat nappaalanertut atuagassiami Ugeskrift for Lægerimi taaneqarpoq. Statens Serum Institut, nappaatit tuniluunnerannik nakkutilliisartoq taama aamma oqarpoq.

Nappaatipiluit klamydia, syfilis gonorrélu nunatsinni aamma tuniluuttorujussuupput. Syfilisimik tunillanneqarsimasutut nalunaarsorneqarsimasut 2016-imi 71-iupput, 2011-mut naleqqiullugu amerleriarujussuarlutik. Syfilisimimmi tunillanneqarsimasutut nalunaarsorneqarsimasut taamanikkut pingasuummata.

Innuttaasut klamydiamit, syfilisimit gonorrémillu tunillaneqarsimasut 2016-imi katillugit 4500-t missaanniipput.

Nappaatipiluit tuniluunnerujussuat innuttaasut imminut illersorneq ajornerannut takussutissaasoq, nunatta taamanikkut nakorsaanerata Henrik Trykkerip 2016-imi tikkuarpaa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk