Juullimut ammartakkat Kalaallit Nunaat assigiinngisitaartoq takutippaa
Danskit amerlanersaasa DR-ip ammartagaliatoqaa "Nissebanden i Grønland" ilisimavaat.
Kalaallilli kikkorpiaanersut pillugit danskit qanoq ilisimasaqartigaat?
Aaqqissuisut DR-imeersut Emil Rothstein-Christensen aamma Mikkel Rønnau P1-imit suliakkiissut tigugamikku imminnut taama aperisimapput.
- Danmarkimi Kalaallit Nunaat pillugu paasissallugit suut soqutiginarsinnaappat. Paasivarpullu danskit naalaaartartut naliginnaasut akornanni Kalaallit Nunaat pillugu ilisimasat amigartut. Suut allaassutigaat, ulluinnarnilu Kalaallit Nunaanni susoqartarpa?
Ullutsinni kalaaleq nassuiarniarsimavaat
Tamatuma kinguneraa sapaatit akunnerini pingasuni nuummiinneq, tassanilu nuummiut naliginnaat amerlasuut pulaarneqarput apersorneqarlutillu.
Naak Nuuk Kalaallit Nunaanni piffinnit allanit allaanerugaluartoq aamma Kalaallit Nunaata ilamineraa, Emil Rothstein-Christensen oqarpoq.
- Qujanartumilli Nuuk illoqarfiuvoq assigiinngitsorpassuarnik inulik, Kalaallit Nunaannit tamarmit aggersut tassani najugaqarput. Taamaattumik eqqarsarpugut Kalaallit Nunaannit tamarmiit pissarsisinnaalluta; ullutsinni kalaaliuneq nuummiuunerlu qanoq nassuiarneqarsinnaappat.
Soqutiginnilersitserusupput
Danskit ikinnerpaamik 350.000-it ammartagaq "3900 Nuuk" ataaseq tusarnaarsimavaat. Immikkoortut tamarmik ullutsinni kalaaliuneq qanoq nassuiarneqarsinnaanersoq sammivaat.
Naleqqulluinnartumillu atuakkiortup Niviaq Korneliussenip immikkoortut tamaasa oqaassutinik Kallaallit Nunaannullu ilitsoqqussamut asanninnermik aallarnertarpai.
Emil Rothstein-Christensenip suleqataatalu Mikkel Rønnauip neriuutigaat danskit tamakku paasilluarsimassagaat.
- Pingaarnerpaatullu alapernaatsilersimassagaat. Kalaallit Nunaannut, Nuummut inunnullu soqutiginnilersitsilersimagutta iluatsissimassaaq.