Juullimi ileqqoq siorasaarinikkut uninngujoorpoq

Hans Egedep oqaluffiani ukiut tamaasa juullimut tusarnaartitsineq ingerlanneqartuartoq ukiormanna KNR-TV-mi aallakaatinneqarnissaa qularnarsivoq. Ilagiit sinniisaat taama kissaateqartuupput.
Allattoq Per Andersen
oktobarip 21-at 2011 09:15

Ukiorpassuarni juullilerani pisartut ilaat ukiormanna pisussaajunnaarpoq ilagiit sinniisaanni ilaasortat siorasaarneqartarmata. Sillimaniarneq pissutigalugu matut matuneqartarput naak suli KNR-kkut toqqaannartumik aallakaatinneqartumik tusarnaartitsinermut iserusuttorpassuaqaraluartoq.

Tusarnaartitsinermut isinngitsoortut matulerisunut nuannginngitsunik suaartartarsimapput tamannalu ilagiit sinniisaasa akuersaaginnarumajunnaarpaat.

- Suliarput taamaallaat nakkutigaarput, immikkoortitsillutalu sulineq ajorluta. Soorlu inissaqannginneq pissutigalugu isinngitsoortartut taama pasillertaraluaraatigut, Anthon Falksen Nuummi ilagiit sinniisaanni siulittaasoq oqarpoq.

Oqaatsit sakkortuut matulerisunut aninneqartartut Anthon Falksenip oqarnera malillugu ilaatigut tassapput kammalaatigiiaarnermut pasilliutit. Ilaatigut matumi paarsisut akerartorneqartarsimapput ilaqutariit taakkua pissusaat taamatut ittoq qangali ilisimaneqartoq.

Ilagiit sinniisaasa 13-nik ilaasortaqartut ajornartorsiut ukiut tamaasa pisartoq aggustimi eqqartorpaat. Piffissaalluarallartillugu saaffiginnittoqarnissaa pillugu siusissukkut eqqartoneqarsimavoq.

- Ilumoorpoq ukiarmi ilagiit sinniisaanniit nalunaarfigineqaratta ukioq manna toqqaannartumik KNR-TV-kkut aallakatitsisoqarnissaa kissaatigineqanngitsoq. Ilagiit sinniisaat juullimut tusarnaartitsinermut akisussaasuusarput, piumasaallu tusaatissatut tigusariaqarsimavarput, KNR-TV-mi aallakaatitsinermut pisortaq Jan Berg oqarpoq.

Anthon Falksen KNR.gl-mut oqarpoq Hans Egedep oqaluffiani juullimut tusarnaartitsisarnerit unitsivinneqanngitsut. Toqqaannartumik TV-kkut aallakaatitsinerit ingerlaqqinnissaannut periarfissatut tikkuarpaa aamma Sisimiuniik Ilulissaniilluunniit aallakaatitsisoqarsinnaasoq.

Nuummi ilagiit sinnisaat aamma KNR pingasunngorpat ataatsimeeqatigiissapput. KNR-imiit erseqqissaatigineqarpoq juullimi tusarnaartitsinissap aallakaatinissaa taamaativinneqanngitsoq pingasunngorpallu ataatsimiinnermi aaqqiissutaasinnaasut eqqartorneqassasut.