Justus Hansen Folketingemut qinigassanngortippoq
Demokraatit Folketingimut qinigassanngortitaat ataatsimik ilapput. Tassalu Inatsisartunut ilaasortaasimasoq Justus Hansen, taanna ullumikkut Kommuneqarfik Sermersuup kommunalbestyrelsiani ilaasortaavoq.
Piffissami eqqissiviilliorfiusumi Kalaallit Nunaanni toqqissisimanerusumik pilersitsinissaq Folketingimut qinigassanngortittup anguniarpaa.
Tamannallu pissaaq Kalaallit Nunaat nunat killiit Illersoqatigiiffiannut NATO-mut tapersiineruguni.
- Danskit sakkutuuinut, sakkutuunut imarsiortunut sakkutuullu timmisartortuinut ilanngussinnaaneq ukkatarinerusariaqarparput, Justus Hansen qineqqusaarutimini taama allappoq.
AAMMA ATUARUK Anna Wangenheim Demokraatit Folketingimut sassartitatuarigallarpat
- Nutaanik sakkutooqarfiliornissamut nunaminertanik tapersiisinnaavugut. Uani eqqarsaatigaakka, NATO-p sakkutooqarfiit nutaat, aamma Kangerlussuup piorsarneqarsinnaanera, Justus Hansen tusagassiuutinut nalunaarummi taama allappoq.
Taassuma erseqqissaatigaa, taama siunnersuuteqarnermini sakkusiortoqarnerunissamik isigineqassanngimmat taamaattorli Kalaallit Nunaanni naalagaaffeqatigiinni nunanilu killerni toqqissisimasuunissaanik qulakkeeriniarnertut isigineqassammat.
Danmark sakkunik atortussanillu Ukrainemut nassiussissalluni aalajangersimappat, Letlandilu illersorniarlugu qamussuarnik sorsuutinik nassiussisoqassappat, taamaalilluni naalagaaffeqatigiit, Kalaallit Nunaat ilanngullugu sorsunnermut peqataavoq.
AAMMA ATUARUK Ataatsimut isigalugu: Kalaallit qinigassanngortittut qineqqusaarutaallu aaku
Taamaattumik Kalaallit Nunaat aamma tapersiisariaqarpoq, Demokraatit Folketingimut qinigassanngortitaat Justus Hansen tusagassiuutinut nalunaaruteqarluni taama allappoq.
-Isumaqarpunga nammineq soqutigisarigipput aammalu pisussaaffigigipput sorsuttoqarnerani, Justus Hansen taama oqarpoq.
Demokraatit folketingimut qinigassanngortitaminnik sassartitsereerput tassalu siornatigut naalakkersuisunut ilaasortaq Anna Wangenheim, Demokraatit sinnerlugit folketingimut qinigassanngortippoq.
