Josef Motzfeldt: Isumalioqatigiissitaq pisariaqanngilaq
Naalakkersuisut Saammaasseqatigiinnissamut Isumalioqatigiissitamik pilersitsiniarnerminni ukiunut sisamanut 10 millionit koruunit missaannik immikkoortitsisimapput, taamaaliornissarli pisariaqanngikkaluartoq Josef Motzfeldt isumaqarpoq, Inatsisartuni ilaasortat akornanni oqalliseriaatsip sakkortusisimanera aamma arajutsisimanngilaa:
- Inatsisartut inatsisiliortut innuttaasunit qinerneqarnikuummata namminneq aalajangersinnaavaat nipi torersoq qanoq ittoq atussanerlugu, taamaammat 10 millionit koruunit atorlugit qanoq saamanerutigisumik ataqqeqatigiinnerusumillu pissusilersortoqassanersoq inuiaat namminneq iliuutsimikkut aaqqitassaraat. Aamma maluginianngitsoorneqarsimanavianngilaq Danmarkip naalakkersuisuisa nunatsinni naalakkersuisut Saammaasseqatigiinnissamut Isumalioqatigiissitaliorniarnerannut peqataarusunnginnerat pisariaqanngitsutullu isigigaat. Taamaattumik isumalioqatigiissitaliornissaq pisariaqanngikkaluarpoq imaluunniit suliassanit sallerpaatinneqartariaqanngikkaluarpoq, Josef Motzfeldt oqarpoq..
Taanna aamma isumaqarpoq naalakkersuisut ullumikkut uungaaraannaq isigisumik politikkeqartut, taamaattumillu siunissamik isumallualersitsisinnaasunik Naalakkersuisoqalernissaq pisariaqaraluartoq.
- Naalakkersuisut isumalluarnermik siunissamullu avungaraallak isigisumik ingerlatsinerarlugit oqartoqarsinnaanngilaq, allaanngilaq aqaguinnarmut eqqarsartut. Uungaaraannaq isigineq partiit tamarmik oqaasiinnartigut isumagissanngippassuk avungangaatsiaq innuttaasut isumalluarnermik takorluuisinnaanngorlugit naalakkersuinikkut oqallinnikkut ingerlanneqartariaqartoq pisariaqartippara, Josef Motzfeldt oqarpoq.
Josef Motzfeldtip siunnersuutigaa aningaasat Saammaasseqatigiinnissamut Isumalioqatigiissitamut pilersitsinissamut 10 millionit koruunit tungaannut immikkoortinneqarsimasut unitsillugit kulturimut eqqumiitsuliornikkullu suliniutinut atorneqartariaqaraluartut. Aamma isumaqarpoq inuiattut ilivitsuulluta ingerlassagutta anersaakkut kulturikkullu naleqartitatsinnik pingaartitatsinnik ilisimaarinnilluta isumaqatigiillutalu ingerlariaqqittariaqaraluartugut.