John Kerryp nunatsinnut tikeraarnera pingaaruteqartoq

Naalakkersuisuni ilaasortap danskillu ministeriata nunarsuami politikerini nuimanersaat ilaata, tassa Amerikap nunanut allanut tunngasunut ministeriata, John Kerryp, nunatsinnut tikeraartinnissaa ukiuni arlalinni pilersaarutigisimavaat.

John Kerry Danmarkimut tikeraareeruni nunatsinnut tikeraassaaq. KNR-illu paasissutissaatai aallaavigalugit Kangerlussuarmut ullumi tallimanngornermi ullup qeqqata missaani tikissaaq.

Aamma atuaruk John Kerryp tikeraarnissaanut politiit piareersimapput

Naalakkersuisut siulittaasuat Kim Kielsen aamma Vittus Qujaukitsoq Kangerlussuarmi naapissavai, danskillu nunanut allanut tunngasunut ministeria Kristian Jensen ilagalugit ingerlaannaq Ilulissanukassapput.

Silap pissusiata allanngoriartornera, taassumalu kingunerisaanik nunatta unammillernartitai immikkut oqaluuserineqassapput. Saniatigullu politikkikkut oqaloqatigiissapput, USA-p Issittumi Siunnersuisoqatigiinnit siulittaasuunerani pilersaarutit oqaluuserineqassallutik.

Aamma atuaruk John Kerry Nunatsinnukalersoq

Kiisalu USA-p nunatsinni illersornissakkut suleqatigiinneranni Pituffik ataatsimiinnermi oqaluuserineqassaaq.

KNR-illu paasissutissaatai naapertorlugit oqaluuserisassat pereerpata sakkutuut umiarsuaat atorlugu issittoq takornariassavaat, taaamaalilluni silap pissusiata allanngoriartornera John Kerryp nammineq isiminik takussavai.

Oqaluuserisatik naammassigunikkit, takusassatillu takoreerunikkit unnukkut aallaqqissapput.