John Kerry Nunatsinnukalersoq

Danmarkip nunanut allanut tunngasunut ministeria Kristian Jensen, nunanullu allanut tunngasunut naalakkersuisoq Vittus Qujaukitsoq qaaqqusisuupput.

Issittoq, silap pissusia, Syria, Islamisk Stat, Ukraine niueqatigiinnerlu pillugu suleqatigiinnerit John Kerryp Danmarkimut Nunatsinnullu tikeraarnerani pingaarnertut eqqartorneqassapput.

Danmarkip USA-mik suleqateqarluarnera tikeraarnermi naqissuserneqassasoq Kristian Jensenip oqaatigaa.

- Issittoq pillugu qanimut suleqatigiissuteqareerpugut. John Kerryllu Kalaallit Nunaannut tikilluaqqunisssaa, Vittus Qujaukitsoq peqatigalugu taamaammat nuannaarutigaara. Silap pissusiata allanngoriartornerata sunniuteqaatai nammineq taava takusinnaassavaa, Kalaallit Nunaatalu tassunga atatillugu unammilligassai annertunerusumik ilisimasaqarfigilissallugit, Kristian Jensen oqarpoq.

USA-p nunanut allanut tunngasunut ministeriata Nunatsinnut tikeraarnissaa Vittus Qujaukitsup aamma nuannaarutigaa:

- John Kerryp Kalaallit Nunaannut tikeraarnerani amerikamiut issittumut soqutiginnillutik aallussinerat erseqqissarneqarpoq. USA maannakkorpiaq Issittunut Siunnersuisoqatigiinnut siulittaasoqarfeqartitsivoq, tassani uagut aamma Issittumi innuttaasut taakkualu pisariaqartitaat aallullugit pilersitsiviulluartumik suleqatigiinnerup ingerlaqqinnissaa Kalaallit Nunaanni pingaartillutigu. Tikeraarnerup peqatigisaanik apeqquterpassuit Kalaallit Nunaata, Danmarkip aamma USA-p ataatsimoorlutik soqutigisaqarfigisaasa oqaloqatigiissutiginissaannut uagutsinnut periarfissiivoq, tassanilu aamma ilaavoq USA-mik illersornissaq pillugu suleqateqarneq, Vittus Qujaukitsoq oqarpoq.

John Kerry Nunatsinnukaruni juunip ulluisa 17-ianni Ilulissiassasoq nalunaarutigineqarpoq.