Johan Lund Olsen: Pineqaatissinneqarsimasunut inissiisarfinnut aningaasaliissutit amerlineqarlik

Danskit aningaasanut inatsisaannut aappaagumut atuuttussamut isumaqatiginniartoqarnerani Kalaallit Nunaanni eqqartuussivinni suliassarpassuit 8000-it utaqqiinnartut suliarineqarnissaannut immikkut 20 millioner kr.-inik immikkoortitsisoqarpoq.
Allattoq Jaaku Lyberth
novembarip 14-at 2013 03:52

Eqqartuussivinni suliassarpassuit naammassineqarnissaannut aningaasat taakkua naammannersut, danskit partiivisa akornanni oqallisaavoq.
 
Aningaasat immikkoortinneqartut ikippallaarnissat konservatiivinit ernummatigineqarpoq, suliassallu allat aamma takkussuuttussaammata.
Inuit Ataqatigiit sinnerlugit Folketingimi ilaasortaq Johan Lund Olsen oqallinnermut ilannguppoq apeqqullu nutaaq saqqummiullugu.

- Pineqaatissinneqartut sumut inissinneqassappat? Johan Lund Olsen aperivoq,  aperinerminut eqqaasaa tassaavoq, Kangerlussuarmi pineqaatissinneqarsimasunut inissiissarfiugallartoq, taanna aappagumut septemberip qaammataata tungaanut atorneqartussanngorlugu aningaasaliiffigineqartoq.

- Pisut imminnut ataqatigiipput, eqqartuussivinni suliassarpassuit  suliaralugit aallartinneqarsinnaanngillat pineqaatissinneqarsimasunut inissat qulakkeerneqartinnagit, Johan Lund Olsen oqarpoq.
 
Pinerluuteqarsimasunut isumaginnittoqarfiup aningaasaqarneranut 2013-imit 2016-imut atuuttussanut isumaqatigiissuteqarnermi danskit partiivi arlaqarlutik isumaqatigiiipput, Kalaallit Nunaanni pineqaatissinneqarsimasunut inissiisarfinnut, inissinneqartussat ikilisarneqarnissaannut 14,1 millioner kr.-it 2013-imit 2014mut atorneqassasut.

- Maanna eqqartuussivinni suliassarpassuit ikilisarneqarnissaat anguniarlugu immikkut iliuuseqalernissami siunertaqanngilluinnarpoq Kangerlussuarmi isertitsiviugallartoq 2014 septembarimi aamma matusariaqassappat, Johan Lund Olsen oqarpoq, imalu nangilluni:

- Kikkummi tamarmik takusinnaavaat eqqartuussivinni pineqaatissinneqarumaartussat amerliartuleqqissasut eqqartuussiviit suliassanut malinnaasinnaalernerat ilutigalugu. Taamaammat Inuit Ataqatigiit tungaanniit piumasaraarput suli aningaasaliisoqaqqissasoq Kangerlussuarmi isertitsiviugallartup 2014-ip kingorna ingerlateqqinneqarsinnaanissaa qukalleersinnaajumallugu, Johan Lund Olsen oqarpoq.

Johan Lund Olsenip danskit inatsisinik atuutsitsinermut ministeriat Morten Bødskov tallimanngorpat ataatsimeeqatigissavaa.